ទំហំពាណិជ្ជកម្មកម្ពុជា-អាស៊ាន កើនដល់ជិត ១៥ពាន់លានដុល្លារ រយ:ពេល១១ខែ ឆ្នាំ២០២៥

ភ្នំពេញ៖ រយៈពេល១១ខែ ឆ្នាំ២០២៥ ពោលគិតចាប់ពីខែមករា-វិច្ឆិកា ទំហំពាណិជ្ជកម្មកម្ពុជា-អាស៊ាន សម្រេចបានក្នុងទំហំទឹកប្រាក់ប្រមាណជាង ១៤,៩ពាន់លានដុល្លារ កើនឡើង ៣.៧៦% បើធៀបរយៈពេលដូចគ្នាក្នុងឆ្នាំ២០២៤។ នេះបើតាមរបាយការណ៍របស់ក្រសួងពាណិជ្ជកម្មដែលស៊ីស៊ីថាមស៍ទទួលបាន។

បើតាមរបាយការណ៍ រយៈពេល១១ខែ ឆ្នាំ២០២៥ កម្ពុជាបាននាំចេញទំនិញទៅទីផ្សារអាស៊ានក្នុងទឹកប្រាក់ប្រមាណ ៥,១៣ ពាន់លានដុល្លារ កើនឡើង ៨,៨៩% បើធៀបរយៈពេលដូចគ្នាក្នុងឆ្នាំ២០២៤ និងនាំចូលមកវិញក្នុងទឹកប្រាក់ប្រមាណ ៩,៨ ពាន់លានដុល្លារ កើនឡើង ១.២៦% បើធៀបរយៈពេលដូចគ្នាក្នុងឆ្នាំ២០២៤។

រយៈពេល១១ខែកន្លងទៅនេះ ទីផ្សារសំខាន់ៗប្រចាំអាស៊ានដែលកម្ពុជានាំចេញទំនិញច្រើនជាងគេគឺវៀតណាម ក្នុងទឹកប្រាក់ប្រមាណ ៣,៣ ពាន់លានដុល្លារ កើនឡើង ០.៣៧% បើធៀបរយៈពេលដូចគ្នាក្នុងឆ្នាំ២០២៤។ បន្ទាប់មកមាន សិង្ហបុរី ថៃ ម៉ាឡេស៊ី ឥណ្ឌូនេស៊ី ហ្វីលីពីន ព្រុយណេ ឡាវ មីយ៉ាន់ម៉ា និងទីម័រ។

មុខទំនិញសំខាន់ៗដែលកម្ពុជានាំចេញមានដូចជា សម្លៀកបំពាក់ វាយនភ័ណ្ឌ ស្បែកជើង ទំនិញធ្វើដំណើរ ផលិតផលកសិកម្ម (ដូចជា ស្រូវ អង្ករ គ្រាប់ស្វាយចន្ទី និងដំឡូងមី និងកៅស៊ូ) គ្រឿងសង្ហារឹម សំបកកង់រថយន្ត បន្ទះសូឡា កង់ សម្ភារៈអគ្គិសនី គ្រឿងបង្គុំអេឡិចត្រូនិក គ្រឿងបង្គុំយានយន្ត និងផលិតផលជលផលជាដើម៕