នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និងជាប្រធានអាស៊ាន នៅថ្ងៃទី០៨ធ្នូនេះ បានចេញសារសម្តែងការព្រួយបារម្ភយ៉ាងខ្លាំងចំពោះការប៉ះទង្គិចគ្នាដោយអាវុធរវាងកងកម្លាំងថៃ និងកម្ពុជាតាមបណ្តោយព្រំដែន។ លោក អាន់វ៉ា ជំរុញឱ្យថៃ និងកម្ពុជា បញ្ឈប់ការប្រយុទ្ធគ្នា ការពារជនស៊ីវិល និងត្រឡប់ទៅរកមាគ៌ាការទូតដែលគាំទ្រដោយច្បាប់អន្តរជាតិ និងស្មារតីអ្នកជិតខាងអាស៊ាន ហើយម៉ាឡេស៊ីប្តេជ្ញាចូលរួមសម្របសម្រួលស្តារភាពស្ងប់ស្ងាត់ និងទប់ស្កាត់ការកើតសង្រ្គាមឡើងវិញ។
ក្នុងសាររបស់នាយករដ្ឋមន្ត្រីម៉ាឡេស៊ី បានចូលរួមរំលែកទុក្ខជាមួយក្រុមគ្រួសាររបស់អ្នកដែលបានស្លាប់ ឬរងរបួស។ ការប្រយុទ្ធគ្នាឡើងវិញនេះ ប្រឈមនឹងហានិភ័យនៃការបំផ្លាញការងារដែលបានធ្វើឡើងដោយប្រុងប្រយ័ត្ន ក្នុងការធ្វើឱ្យមានស្ថិរភាពទំនាក់ទំនងរវាងប្រទេសជិតខាងទាំងពីរ។
នាយករដ្ឋមន្ត្រីម៉ាឡេស៊ី បានលើកឡើងថា ប្រទេសថៃ និងកម្ពុជា គឺជាដៃគូជិតស្និទ្ធរបស់ប្រទេសម៉ាឡេស៊ី និងជាសមាជិកសំខាន់ៗរបស់អាស៊ាន។ ម៉ាឡេស៊ី ជំរុញឱ្យភាគីទាំងពីរអនុវត្តការអត់ធ្មត់អតិបរមា រក្សាបណ្តាញទំនាក់ទំនងបើកចំហ និងប្រើប្រាស់យន្តការដែលមាន។ ប្រទេសម៉ាឡេស៊ី ត្រៀមខ្លួនជាស្រេច ដើម្បីគាំទ្រជំហានដែលអាចជួយស្តារភាពស្ងប់ស្ងាត់ និងជៀសវាងការឡើងឧប្បត្តិហេតុបន្ថែមទៀត។
នាយករដ្ឋមន្ត្រីម៉ាឡេស៊ី បញ្ជាក់ថាតំបន់អាស៊ានមិនអាចមានលទ្ធភាពមើលឃើញជម្លោះយូរអង្វែងធ្លាក់ចូលទៅក្នុងវដ្តនៃការប្រឈមមុខដាក់គ្នានោះទេ។ អាទិភាពបន្ទាន់គឺការបញ្ឈប់ការប្រយុទ្ធគ្នា ការពារជនស៊ីវិល និងត្រឡប់ទៅរកមាគ៌ាការទូតដែលគាំទ្រដោយច្បាប់អន្តរជាតិ និងស្មារតីអ្នកជិតខាងដែលអាស៊ានពឹងផ្អែក៕
