បាងកក៖ ស្ថានទូតចិនប្រចាំប្រទេសថៃ បានផ្សព្វផ្សាយសារមួយនៅលើគេហទំព័រផ្លូវការដោយបញ្ជាក់ថានៅថ្ងៃទី២៩ ខែវិច្ឆិកា នេះថាមានពលរដ្ឋចិនម្នាក់បានរងរបួសដោយគ្រាប់មីន នៅតំបន់ព្រំដែនថៃនិងកម្ពុជា។
ស្ថានទូតចិនបានបញ្ចាក់ថា បន្ទាប់ពីកើតហេតុ ស្ថានទូតចិនប្រចាំប្រទេសថៃ បានទាក់ទងបន្ទាន់ជាមួយអាជ្ញាធររបស់ថៃ ដើម្បីសម្របសម្រួលឱ្យភាគីថៃព្យាបាលជនរងគ្រោះ។ បច្ចុប្បន្ន ស្ថានភាពរបួសរបស់ពលរដ្ឋចិនរូបនោះកំពុងតែទទួលការព្យាបាល។ ស្ថានទូតនឹងបន្តរក្សាការទំនាក់ទំនងជិតស្និទ្ធជាមួយមន្ទីរពេទ្យ និងអាជ្ញាធរថៃ ហើយនឹងផ្តល់ជំនួយចាំបាច់ដល់ជនរងគ្រោះ។
ស្ថានទូតចិនប្រចាំប្រទេសថៃ ក៏បានណែនាំឲ្យពលរដ្ឋចិនដែលស្នាក់នៅថៃ ឬមានគម្រោងធ្វើដំណើរទៅថៃ គោរពតាមច្បាប់ ទាក់ទងនឹងការឆ្លងដែនចេញចូលរបស់ប្រទេសថៃ ។
