បាត់ដំបង៖ រដ្ឋមន្រ្តីក្រសួងការងារ បន្តអំពាវនាវឱ្យអតីតពលករខ្មែរ ដែលបានមកដល់ប្រទេសកម្ពុជាហើយ គួរពិចារណាធ្វើការនៅក្នុងស្រុកវិញ ដើម្បីទទួលបានប្រាក់ចំណូល និងអត្ថប្រយោជន៍ផ្សេងៗ និងពុំគួររង់ចាំរហូតដល់ស្ថានភាពព្រំដែនល្អប្រសើរឡើងនោះឡើយ។ ប្រសាសន៍នេះត្រូវបានលើកឡើងក្នុងពិធីបើកពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ សម្រាប់អតីតពលករដែលត្រឡប់មកពីប្រទេសថៃ នៅព្រឹកថ្ងៃទី១៦ ខែវិច្ឆិកា ឆ្នាំ២០២៥នេះ នៅទីធ្លាសាធារណៈឃុំគារ ស្រុកមោងឫស្សី ខេត្តបាត់ដំបង។
នាឱកាសនេះ លោក ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ពីភាពវិជ្ជមានសម្រាប់ការសម្រេចចិត្តធ្វើការងារក្នុងស្រុកដែលអតីតពលករនឹងទទួលបានអត្ថប្រយោជន៍ទៅពិនិត្យ និងព្យាបាលជំងឺដោយឥតគិតថ្លៃតាមរយៈប័ណ្ណសមាជិក ប.ស.ស. ប្រាក់សោធនសម្រាប់អ្នកធ្វើការដល់អាយុ ៦០ឆ្នាំ និងការរស់នៅជួបជុំក្រុមគ្រួសារដោយភាពកក់ក្ដៅ និងស្និទ្ធស្នាល អាចចូលរួមពិធីបុណ្យទាន និងវប្បធម៌ប្រពៃណីបានគ្រប់ពេលវេលា រួមទាំងភាពងាយស្រួលក្នុងការទំនាក់ទំនង និងយោគយល់គ្នា ជាពិសេស នៅកន្លែងធ្វើការដែលប្រើប្រាស់ភាសាខ្មែរដូចគ្នា។
រដ្ឋមន្រ្តីក្រសួងការងារ បានអំពាវនាវឱ្យអតីតពលករខ្មែរ ដែលបានមកដល់ប្រទេសកម្ពុជាហើយ គួរពិចារណាធ្វើការនៅក្នុងស្រុកវិញ ដើម្បីទទួលបានប្រាក់ចំណូល និងអត្ថប្រយោជន៍ផ្សេងៗ និងពុំគួររង់ចាំរហូតដល់ស្ថានភាពព្រំដែនល្អប្រសើរឡើងនោះឡើយ។ លោកក៏បានបន្តអំពាវនាវឱ្យអតីតពលករ និងអ្នកដែលកំពុងស្វែងរកការងារធ្វើ អាចទាក់ទងប្រព័ន្ធទូរស័ព្ទ Hotline លេខ១២៩៧ ប្រសិនបើមានចម្ងល់ផ្សេងៗ ទាក់ទងនឹងការចុះឈ្មោះស្វែងរកការងារធ្វើ ចុះឈ្មោះរៀនជំនាញបច្ចេកទេស និងវិជ្ជាជីវៈ ដោយឥតគិតថ្លៃ ហើយអាចទាក់ទងពីថ្ងៃចន្ទដល់ថ្ងៃសុក្រ និងថ្ងៃសៅរ៍-អាទិត្យ ផងដែរ។
គួរបញ្ជាក់ថា ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ សម្រាប់អតីតករមកពីប្រទេសថៃ នៅស្រុកមោងឫស្សី ខេត្តបាត់ដំបង នាពេលនោះបាននាំយកឱកាសការងារប្រមាណជាង ១,១ម៉ឺនកន្លែង និងព័ត៌មានស្តីពីអត្ថប្រយោជន៍នៃរបបសន្តិសុខសង្គម (ប.ស.ស.) និងការបណ្តុះបណ្តាលជំនាញបច្ចេកទេស និងវិជ្ជាជីវៈដោយឥតគិតថ្លៃ នៅព្រឹកថ្ងៃទី១៦ ខែវិច្ឆិកា ឆ្នាំ២០២៥នេះ នៅទីធ្លាសាធារណៈឃុំគារ ស្រុកមោងឫស្សី ខេត្តបាត់ដំបង ដែលរៀបចំដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ រដ្ឋបាលស្រុកមោងឫស្សី សហភាពសហព័ន្ធយុវជនកម្ពុជា ខេត្តបាត់ដំបង វិស័យឯកជន សមាគមមិត្តយើង អ្នកផ្តល់ការអប់រំបណ្តុះបណ្តាល និងដៃគូពាក់ព័ន្ធផ្សេងទៀត ដែលមានអ្នកចូលរួម ១ ២០០នាក់។
ក្នុងពិព័រណ៍ដ៏សំខាន់នេះ មានសហគ្រាស ក្រុមហ៊ុន រោងចក្រ និងតំបន់សេដ្ឋកិច្ចពិសេសចំនួន ១៧ បានចូលរួមសម្ភាស និងជ្រើសរើសបុគ្គលិកភ្លាមៗដោយផ្ទាល់ផងដែរ។ជាមួយគ្នានេះ បងប្អូនអតីតពលករ និងអ្នកចូលរួមទាំងអស់ បានទទួលការដឹកជញ្ជូន អាហារ ភេសជ្ជៈ និងកាហ្វេ ព្រមទាំងទទួលបានការកាត់សក់ពីអ្នកជំនាញដោយឥតគិតថ្លៃថែមទៀតផង។
ក្រសួងការងារបញ្ជាក់ថា ការរៀបចំពិព័រណ៍នេះ គឺជាលើកទី៥ហើយសម្រាប់បងប្អូនអតីតពលករ និងប្រជាពលរដ្ឋនៅក្នុងខេត្តបាត់ដំបង ខណៈដែលវាជាពិព័រណ៍លើកទី ៥៧៤ដែលក្រសួងការងារ និងបណ្តុះបណ្តាលវិជ្ជាជីវៈបានរៀបចំនៅទូទាំងប្រទេស៕
_1.jpg?1777864565)
