លោកស៊ីជិនពីងថា«ចិន-ថៃ»ស្និទ្ធដូចគ្រួសារតែមួយ

ចិន៖ ប្រធានាធិបតីចិន លោក ស៊ី ជីនពីង បានជួបជាមួយព្រះមហាក្សត្រ មហា វជិរ៉ាឡុងកន នៃព្រះរាជាណាចក្រថៃ នៅទីក្រុងប៉េកាំង កាលពីថ្ងៃសុក្រ ដោយលោកបានអំពាវនាវឱ្យមានកិច្ចខិតខំប្រឹងប្រែងរួមគ្នា ដើម្បីជំរុញបន្ថែមទៀតនូវការកសាងសហគមន៍ចិន-ថៃ ដែលមានអនាគតរួមគ្នា លោកបានបញ្ជាក់ទៀតថាប្រទេសចិន និងថៃប្រៀបបានដូចជាគ្រួសារតែមួយ។ ការប្រកាសរបស់លោកស៊ីនេះធ្វើឡើងក្នុងជំនួបជាមួយព្រះមហាក្សត្រថៃដែលកំពុងតែបំពេញទស្សនកិច្ចទៅកាន់ប្រទេសចិនរយៈពេល ៥ ថ្ងៃជាប្រវត្តិសាស្រ្តលើកដំបូងចាប់តាំងពីឡើងគ្រងរាជ្យ។

បើតាមលោកលោក ស៊ី បានមានប្រសាសន៍ថា ព្រះមហាក្សត្របានចាត់ទុកប្រទេសចិនជាប្រទេសធំដំបូងគេ ដែលបានយាងបំពេញទស្សនកិច្ចផ្លូវរដ្ឋ ហើយជាព្រះមហាក្សត្រថៃដំបូងគេ ដែលបានយាងបំពេញទស្សនកិច្ចនៅប្រទេសចិន ចាប់តាំងពីការបង្កើតទំនាក់ទំនងការទូត ដែលឆ្លុះបញ្ចាំងយ៉ាងពេញលេញអំពីសារៈសំខាន់ដ៏ធំធេង ដែលភ្ជាប់ជាមួយនឹងទំនាក់ទំនងចិន-ថៃ និងមិត្តភាពដ៏ជ្រាលជ្រៅ ដែលត្រូវបានកំណត់លក្ខណៈថា "ចិន និងថៃ មានភាពជិតស្និទ្ធដូចគ្រួសារតែមួយ"។

សម្រាប់លោកស៊ីនៅចំណុចចាប់ផ្តើមប្រវត្តិសាស្ត្រថ្មីនេះ លោកចង់ធ្វើការជាមួយព្រះមហាក្សត្រថៃ ដើម្បីជំរុញការកសាងសហគមន៍ចិន-ថៃ ជាមួយនឹងអនាគតរួមគ្នាក្នុងរយៈពេល ៥០ ឆ្នាំខាងមុខ និងរួមគ្នាសរសេរជំពូកថ្មីមួយនៅក្នុងមិត្តភាពចិន-ថៃ។

លោកបន្ថែមទៀតថាប្រទេសចិនមានឆន្ទៈក្នុងការធ្វើការជាមួយប្រទេសថៃ ដើម្បីបង្កើនការសម្របសម្រួលយុទ្ធសាស្ត្រអភិវឌ្ឍន៍របស់ប្រទេសទាំងពីរ ជំរុញកិច្ចសហប្រតិបត្តិការជាលំដាប់លើផ្លូវដែកចិន-ថៃ និងគម្រោងធំៗផ្សេងទៀត នាំចូលផលិតផលកសិកម្មដែលមានគុណភាពខ្ពស់បន្ថែមទៀតពីប្រទេសថៃ និងពង្រីកកិច្ចសហប្រតិបត្តិការទ្វេភាគីក្នុងវិស័យថ្មីៗដូចជា បញ្ញាសិប្បនិម្មិត សេដ្ឋកិច្ចឌីជីថល ក៏ដូចជាអាកាសចរណ៍ និងអវកាស ដើម្បីជួយប្រជាជននៃប្រទេសទាំងពីរទទួលបានអត្ថប្រយោជន៍ កាន់តែច្រើនពីកិច្ចសហប្រតិបត្តិការទ្វេភាគី៕