ភ្នំពេញ៖ សម្តេច ហ៊ុន សែន ប្រធានព្រឹទ្ធសភាកម្ពុជា នៅព្រឹកថ្ងៃទី ១០ វិច្ឆិកានេះ បានជួប លោក TAKAHASHI Fumiaki ប្រធានសមាគមជប៉ុន-កម្ពុជា និង គណៈប្រតិភូ ប្រមាណជា៣៦ក្រុមហ៊ុន នៅវិមាន ៧មករា។ក្នុងជំនួបនោះ សម្តេច ហ៊ុន សែន បានប្រកាសគាំទ្រអ្នកវិនិយោគិនជប៉ុននៅកម្ពុជា និងជំរុញឱ្យបង្កើនការបណ្តាក់ទុន នៅក្នុងវិស័យបច្ចេកវិទ្យា ការកែច្នៃផលិតផលកសិកម្ម និង ការបណ្តុះបណ្តាលវិជ្ជាជីវៈ នៅក្នុងប្រទេសកម្ពុជា។
យោងតាមលោក ជា ធីរិទ្ធ អ្នកនាំពាក្យព្រឹទ្ធសភា បានថ្លែងថា ក្នុងជំនួបនោះ លោក TAKAHASHI Fumiaki ប្រធានសមាគមជប៉ុន-កម្ពុជា បានថ្លែងចាត់ទុកប្រទេសកម្ពុជា គឺជាប្រទេសដែលទទួលបានការចាប់អារម្មណ៍ពីសំណាក់ក្រុមហ៊ុនជប៉ុន សម្រាប់ការវិនិយោគលើវិស័យសំខាន់ៗមួយចំនួន។
បើតាមលោក TAKAHASHI Fumiaki ប្រតិភូវិនិយោគិនជប៉ុន ដែលកំពុងបំពេញទស្សនកិច្ចនៅកម្ពុជា និង បានជួបជាមួយសម្តេច ហ៊ុន សែន គឺមានសមាសភាពមកពីក្រុមហ៊ុនជប៉ុនចំនួន ៣៦ ក្រុមហ៊ន ហើយភាគច្រើនចាប់អារម្មណ៍ ចង់ដាក់វិនិយោគ វិស័យបច្ចេកវិទ្យា ការកែច្នៃផលិតផលកសិកម្ម និង ការបណ្តុះបណ្តាលវិជ្ជាជីវៈ។
ជាការឆ្លើយតបសម្តេច ហ៊ុន សែន ប្រធានព្រឹទ្ធសភាកម្ពុជា ពេញចិត្តចំពោះការចាប់អារម្មណ៍របស់ក្រុមអ្នកវិនិយោគជប៉ុន ចំពោះការវិនិយោគនៅកម្ពុជា ហើយសម្តេចស្វាគមន៍ការចាប់អារម្មណ៍វិនិយោគលើ វិស័យបច្ចេកវិទ្យា ការបណ្តុះបណ្តាលវិជ្ជាជីវៈ ដែលជាតម្រូវការរបស់ប្រទេសទាំងពីរ។
