ភ្ជុំបិណ្ឌ៧ថ្ងៃ មានករណីអគ្គិភ័យ១២ករណី ឆាបឆេះអគារស្នាក់នៅ និងកន្លែងប្រកបអាជីវកម្មរបស់ពលរដ្ឋ

ភ្នំពេញ៖ គិតចាប់ពីថ្ងៃកាន់បិណ្ឌទី១ រហូតដល់កាន់បិណ្ឌទី៧ ពោលគឺពីថ្ងៃទី៨ រហូតដល់ថ្ងៃទី១៤ ខែកញ្ញា ឆ្នាំ២០២៥នេះ នៅកម្ពុជាមានគ្រោះអគ្គិភ័យកើតឡើងចំនួន១២ករណី រួមមានអគារស្នាក់នៅរបស់កម្មករ តូបលក់កាហ្វេ និងសម្ភារៈប្រើប្រាស់មួយចំនួនទៀត។ នេះបើតាមអ្នកនាំពាក្យរងក្រសួងមហាផ្ទៃ លោក ទូច សុឃៈ។

លោក ទូច សុឃៈ បានបញ្ជាក់ថាគ្រោះភ័យនេះ បានបណ្ដាលឱ្យឆាបឆេះផ្ទះ៩ខ្នង អគារស្នាក់នៅរបស់កម្មករ៤ខ្នង តូបលក់កាហ្វេ១ និងក្បាលរថភ្លើង១គ្រឿង ព្រមទាំងសម្ភារៈប្រើប្រាស់មួយចំនួនទៀត។ ដោយឡែក ទីតាំងកើតមានអគ្គិភ័យ រួមមាននៅរាជធានីភ្នំពេញ កំពត កំពង់ចាម កំពង់ធំ ត្បូងឃ្មុំ និងខេត្តប៉ៃលិន។

ទោះបីជាស្ថិតក្នុងរដូវវស្សា ករណីគ្រោះអគ្គីភ័យបានបន្តកើតឡើងស្ទើររាល់ថ្ងៃ ដោយភាគច្រើនបណ្ដាលមកពីការធ្វេសប្រហែស ដូចជា ភ្លើងទៀន ធូប និងភ្លើងចង្ក្រាន ខណៈករណីខ្លះបណ្ដាលមកពីបញ្ហាបច្ចេកទេស ដូចជាឆ្លងចរន្តអគ្គិសនីជាដើម។ អ្នកនាំពាក្យរងក្រសួងមហាផ្ទៃ បានអំពាវនាវប្រជាពលរដ្ឋបង្កើនការប្រុងប្រយ័ត្នជានិច្ច ជាពិសេសក្នុងរដូវកាលបុណ្យទានដូចកាន់បិណ្ឌ និងភ្ជុំបិណ្ឌនាពេលនេះ ជាអាទិ៍ភ្លើងទៀនធូប ភ្លើងចង្ក្រាន គឺត្រូវតែពន្លត់ មុនពេលចាកចេញពីផ្ទះសម្បែង។

គួររម្លឹកថា រយៈពេល១៥ថ្ងៃ នៃពិធីកាន់បិណ្ឌ និងភ្ជុំបិណ្ឌឆ្នាំ២០២៤ នៅកម្ពុជាមានគ្រោះអគ្គិភ័យកើតឡើងចំនួន១៣លើក បណ្ដាលឱ្យឆេះផ្ទះ៨ខ្នង បន្ទប់១បន្ទប់ កុដិលោក១ខ្នង ឃ្លាំង១ខ្នង រោងចក្រ១ខ្នង និងរថយន្ដ១គ្រឿង៕