ភ្នំពេញ៖ អគ្គលេខាធិការដ្ឋានគណៈកម្មការព្រំដែនរួម (JBC) នៅថ្ងៃទី ១៩ សីហា ២០២៥ បានដាក់ពាក្យជំទាស់ជាផ្លូវការចំពោះសកម្មភាពយោធាថៃរាយបន្លាលួស និងដាក់កង់ឡាន នៅបណ្តោយព្រំដែនក្នុងទឹកដីកម្ពុជា។ នេះបើតាម លោក នង សាកល អ្នកនាំពាក្យរងក្រសួងក្រសួងការបរទេសកម្ពុជា ថ្លែងក្នុងសន្នីសីទសារព័ត៌មាន នៅព្រឹកថ្ងៃទី ២០ សីហា ២០២៥។
យោងតាម លោក នង សាកល អ្នកនាំពាក្យរងក្រសួងក្រសួងការបរទេសកម្ពុជា បានឱ្យដឹងថា អគ្គលេខាធិការដ្ឋានគណៈកម្មការព្រំដែនរួម (JBC) តាមរយៈក្រសួងការបរទេសកម្ពុជា កាលពីថ្ងៃទី១៩សីហា បានដាក់ពាក្យជំទាស់ផ្លូវការ ចំពោះសកម្មភាពរបស់កងកម្លាំងប្រដាប់អាវុធថៃ ដែលបានដាក់ពង្រាយខ្សែលួសបន្លា បំពាក់សំណាញ់ខ្មៅ និងដាក់កងឡាន នៅតំបន់មួយចំនួន តាមបណ្តោយព្រំដែន ក្នុងដែនអធិបតេយ្យភាពកម្ពុជា។
អ្នកនាំពាក្យរងនៃក្រសួងការបរទេសកម្ពុជារូបនេះ បានបន្តទៀតថា គណៈប្រតិភូ JBC ក៏បានស្នើឱ្យកងទ័ពថៃ រុះរើសម្ភារៈ និងឧបករណ៍ទាំងអស់ ដែលពួកគេបានដាក់ពង្រាយចេញវិញជាបន្ទាន់ ដោយកម្ពុជា ជឿជាក់ថា សកម្មភាពទាំងនោះ បានធ្វើឱ្យប៉ះពាល់ធ្ងន់ធ្ងរ ដល់ការកសាងទំនុកចិត្តរវាងគ្នា។ លោក នង សាកល បានសង្កត់ធ្ងន់ថា ៖«កម្ពុជា សូមអំពាវនាវឱ្យថៃ គោរពពេញលេញចំពោះកិច្ចព្រមព្រៀងទ្វេភាគីនិងកាពត្វកិច្ចអន្តរជាតិទាំងអស់។»។
