សមាគមឧកញ៉ាកម្ពុជាបន្តដឹកនាំសមាជិកគោរពវិញ្ញាណក្ខន្ធវីរកងទ័ពកម្ពុជាដែលបានពលីជីវិតការពារទឹកដីពីការឈ្លានពានរបស់ទ័ពសៀម

ព្រះវិហារ, សៀមរាប៖ អ្នកឧកញ៉ា អ៊ាន អេឡែន អនុប្រធាន និងជាតំណាងលោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា នៅរសៀលថ្ងៃទី១ និងទី២ ខែសីហា ឆ្នាំ២០២៥ បានដឹកនាំគណៈប្រតិភូសមាគមឧកញ៉ាកម្ពុជាដែលរួមមានសមាសភាព អ្នកឧកញ៉ា និងឧកញ៉ា ជាច្រើនរូប ចូលរួមគោរពវិញ្ញាណក្ខន្ធ លោកព្រិន្ទបាលទោ ស៊ីម គា ជាយោធិននៃកងពលតូចអន្តរាគមន៍លេខ៨ និងអនុសេនីយ៍ត្រី ច័ន្ទ តារា ដែលបានពលីជីវិតក្នុងបុព្វហេតុការពារបូរណភាពទឹកដីតទល់នឹងកងទ័ពឈ្លានពានសៀម។

បើតាមសមាគមឧកញ៉ាកម្ពុជា ក្នុងវេលាដ៏ក្រៀមក្រំនេះ អ្នកឧកញ៉ា អ៊ាន អេឡែន បានពាំនាំនូវការចូលរួមរំលែកទុក្ខពីលោកអ្នកឧកញ៉ាប្រធាន ក៏ដូចជាលិខិតរំលែកមរណទុក្ខពីសមាគមឧកញ៉ាកម្ពុជា ជូនក្រុមគ្រួសារ នៃសពលោកព្រិន្ទបាលទោ ស៊ីម គា ដែលមានគេហដ្ឋានដែលស្ថិតនៅភូមិភ្នំដែក ឃុំរមណីយ ស្រុករវៀង ខេត្តព្រះវិហារ និង អនុសេនីយ៍ត្រី ច័ន្ទ តារា នៅស្រុកសូទ្រនិគម ខេត្តសៀមរាប។

មរណភាពរបស់ អនុសេនីយ៍ត្រី ច័ន្ទ តារា និង លោកព្រិន្ទបាលទោ ស៊ីម គា គឺជាការបាត់បង់ស្វាមីដែលប្រកបដោយសង្គហធម៌ដ៏ឧត្តុង្គឧត្តមចំពោះភរិយា ជាឪពុកប្រកបដោយព្រហ្មវិហារធម៌ចំពោះកូនហើយក៏ជាការបាត់បង់យោធិនដ៏អង់អាចក្លាហាន ដោយបានធ្វើពលិកម្មនូវសាច់ស្រស់ឈាមស្រស់ប្រកបដោយភាពមោះមុតនៅក្នុងបុព្វហេតុការពារអធិបតេយ្យ និងបូរណភាពទឹកដី។

វីរភាពដ៏អង់អាចរបស់លោកនឹងស្ថិតក្នុងការចងចាំក្នុងដួងចិត្តប្រជាជនខ្មែរគ្រប់រូបគ្មានថ្ងៃបំភ្លេចបានហើយកេរ្តិ៍ឈ្មោះរបស់លោកនឹងត្រូវបានចារទុកនៅក្នុងប្រវត្តិសាស្ត្រជាតិ៕