ភ្នំពេញ៖ ថ្ងៃទី៧ កក្កដា ឆ្នាំ២០២៥នេះ គឺជាខួបទី១៧ ឆ្នាំនៃការដាក់បញ្ជូលប្រាសាទព្រះវិហារទៅជាសម្បត្តិបេតិកភ័ណ្ឌពិភពលោក។ខួប១៧ឆ្នាំនៅឆ្នាំ២០២៥នេះ គេឃើញប្រជាពលរដ្ឋខ្មែរជាច្រើនបានប្រើប្រាស់បណ្តាញសង្គមបង្ហោះសារអបអរសាទរ និងអមជាមួយការផលិតបទចម្រៀងបង្កើតជាស្មារតីជាតិនិយម។ខួបទី១៧ នៃការដាក់បញ្ជូលប្រាសាទព្រះវិហារទៅជាសម្បត្តិបេតិកភ័ណ្ឌពិភពលោកនេះ ធ្វើឡើងចំពេលដែលកម្ពុជា និងថៃ ផ្តើមមានភាពតានតឹងផ្នែកព្រំដែនឡើងវិញ ក្រោយពីទាហានថៃលបលួចបាញ់ប្រហារឈ្លានពានទឹកដីកម្ពុជា កាលពីថ្ងៃទី ២៨ ឧសភា ឆ្នាំ២០២៥ នាំឱ្យទាហានកម្ពុជាម្នាក់ពលីជីវិត។
ថ្ងៃទី៧ ខែកក្កដា ឆ្នាំ២០០៨ ជាថ្ងៃដ៏អស្ចារ្យមួយសម្រាប់ប្រជាជនកម្ពុជាដែលបានដាក់បញ្ជូល«ប្រាសាទព្រះវិហារ»ទៅជាសម្បត្តិបេតិកភ័ណ្ឌពិភពលោក ដែលនាំឱ្យកូនខ្មែរគ្រប់រូបរំភើបចិត្ត រំជួលចិត្ត ចំពោះកេរដំណែលដ៏វិចិត្ររបស់បុព្វបុរសខ្មែរ។ថ្ងៃទី៧ កក្កដា ឆ្នាំ២០២៥នេះ ការដាក់បញ្ចូលប្រាសាទព្រះវិហារក្នុងបញ្ជីបេតិកភណ្ឌពិភពលោក គឺមានរយៈពេល ១៧ ឆ្នាំហើយ។
ខួប១៧ឆ្នាំនៅឆ្នាំ២០២៥នេះ ព្រះមហាក្សត្រនៃព្រះរាជាណាចក្រកម្ពុជា នាយករដ្ឋមន្ត្រីកម្ពុជា មន្ត្រីតាមក្រសួងស្ថាប័ន និងប្រជាពលរដ្ឋខ្មែរជាច្រើន បានប្រើប្រាស់បណ្តាញសង្គមបង្ហោះសារអបអរសាទរ។សម្រាប់ព្រះមហាក្សត្រ តាមរយៈព្រះរាជសារ បានកោតសរសើរយ៉ាងស្មោះអស់ពីព្រះទ័យ ចំពោះការចុះបញ្ជីប្រាសាទព្រះវិហារជាបេតិកភណ្ឌពិភពលោក ជាសម្បត្តិវប្បធម៌ជាតិផង និង ជាបេតិកភណ្ឌពិភពលោកផង។សម្រាប់ព្រះអង្គ ការចុះបញ្ជីនេះបានរួមចំណែកយ៉ាងសំខាន់ក្នុងការថែរក្សា និង អភិរក្សប្រាសាទព្រះវិហារ ឱ្យបានស្ថិតស្ថេរគង់វង្ស និង ប្រកបដោយចីរភាពនៅលើទឹកដីនៃព្រះរាជាណាចក្រកម្ពុជា។
ចំណែកសម្តេច ហ៊ុន ម៉ាណែត ថ្លែងអបអរសាទរ អមជាមួយខ្លឹមសារថា ប្រាសាទព្រះវិហារ បានលាតសន្ធឹងយ៉ាងធំស្កឹមស្កៃ ប្រៀបដូចជាសំពៅនៅមហាសមុទ្រ ឈរបង្អួតសម្រស់ដ៏ល្អល្អះនៅលើកំពូលភ្នំ។សម្រាប់សម្តេចនាយករដ្ឋមន្ត្រី បានលើកឡើងជាថ្មីម្តងទៀតផងដែរថា «កិច្ចការពារបេតិកភណ្ឌវប្បធម៌ ជាភារកិច្ចរបស់កូនខ្មែរគ្រប់ៗរូប។
ក្រៅពីសារអបអរសាទរពីថ្នាក់ដឹកនាំកំពូលរបស់កម្ពុជា ឃើញក៏ឃើញផងដែរ ការចេញសារអបអរសាទរផ្សព្វផ្សាយតាមបណ្តាញសង្គមជាច្រើននៅក្នុងប្រទេសកម្ពុជា និងមានការចែករំលែកជាបន្តបន្ទាប់ពីប្រជាពលរដ្ឋខ្មែរក្មេងចាស់ប្រុសស្រី បង្កើតមានជាស្មារតីជាតិ ប្រឆាំងការឈ្លានពានទឹកដីពីប្រទេសជិតខាងកម្ពុជា ជាពិសេសថៃ។
សូមរម្លឹកជូនថា ប្រាសាទព្រះវិហារ ត្រូវបានចុះឈ្មោះក្នុងបញ្ជីបេតិកភណ្ឌពិភពលោក កាលពីថ្ងៃទី៧កក្កដាឆ្នាំ២០០៨ ដោយអង្គការយូណេស្កូ ដែលមានប្រទេសកម្ពុជា ជាម្ចាស់កម្មសិទ្ធិបានធ្វើឲ្យរដ្ឋាភិបាលថៃខឹងសម្បារ។ មួយសប្តាហ៍ក្រោយមក ពោលគឺនៅថ្ងៃទី ១៥ កក្កដាឆ្នាំ ២០០៨ កងទ័ពថៃបានបង្កហេតុរហូតដល់ផ្ទុះសង្គ្រាមនៅតាមជាយដែន។កម្ពុជាក៏សុំឲ្យតុលាការក្រុងឡាអេបកស្រាយឡើងវិញនូវសាលក្រមឆ្នាំ១៩៦២ ដែលតុលាការនេះ បានកាត់ក្តីឲ្យកម្ពុជាឈ្នះភាគីថៃ។កាលពីថ្ងៃទី ១៨ កក្កដាឆ្នាំ២០១១ តុលាការយុត្តិធម៌អន្តរជាតិ បានចេញសាលដីកា ដោយតម្រូវឲ្យថៃដកទ័ពចេញពីតំបន់មានជម្លោះ។
ខួបទី១៧ នៃការដាក់បញ្ជូលប្រាសាទព្រះវិហារទៅជាសម្បត្តិបេតិកភ័ណ្ឌពិភពលោកនេះ ធ្វើឡើងចំពេលដែលកម្ពុជា និងថៃ ផ្តើមមានភាពតានតឹងផ្នែកព្រំដែនឡើងវិញ ក្រោយពីទាហានថៃលបលួចបាញ់ប្រហារឈ្លានពានទឹកដីកម្ពុជា កាលពីថ្ងៃទី ២៨ ឧសភា ឆ្នាំ២០២៥ នាំឱ្យទាហានកម្ពុជាម្នាក់ពលីជីវិត៕
