ភ្នំពេញ៖ អគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) បានឆ្លៀតចុះពិនិត្យមើលខ្សែសង្វាក់ផលិតកម្មនិងសកម្មភាពរបស់ក្រុមហ៊ុនកែច្នៃក្នុងស្រុកនៅខេត្តចំនួន៥ ជាប់បឹងទន្លេសាប។ សកម្មភាពនៃការចុះពិនិត្យមានដូចជា ការពិនិត្យទីតាំងផលិតជីកសិកម្ម រោងម៉ាស៊ីនកិនស្រូវ ឃ្លាំងស្កុក និងឡសម្ងួតពោត និងដំឡូងមី ជាដើម។
បន្ទាប់ពីចូលរួមពិធីប្រគល់ស្បៀងនិងសម្ភារៈក៏ដូចជាថវិកា ជូនដល់កងកម្លាំងកងទ័ពជួរមុខដែលកំពុងតែឈរជើង ក្នុងបុព្វហេតុនិងបេសកកម្មការពារបូរណភាពទឹកដីនៅប្រាសាទព្រះវិហារ នាថ្ងៃទី១៥ ខែមិថុនា ឆ្នាំ២០២៥ លោកបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម ក៏បានឆ្លៀតចុះពិនិត្យមើលខ្សែសង្វាក់ផលិតកម្មនិងសកម្មភាពរបស់ក្រុមហ៊ុនកែច្នៃក្នុងស្រុកនៅខេត្តចំនួន៥ ជាប់បឹងទន្លេសាប។
បន្ទាប់មក លោកបណ្ឌិត កៅ ថាច បានបន្តដំណើរ អញ្ជើញចុះសួរសុខទុក្ខនិងពិនិត្យមើលខ្សែសង្វាក់ផលិតកម្មរបស់ គឺ ទី១ ចាប់ផ្តើមនៅរោងម៉ាស៊ីនកិនស្រូវចំនួន ០២ ទីតាំង ដែលមានទីតាំង ស្ថិតក្នុងខេត្តកំពង់ចាម រួមមានរោងម៉ាស៊ីនកិនស្រូវ យូឃីម ស្ថិតនៅក្នុងស្រុកបាធាយ និងរោងម៉ាស៊ីនកិនស្រូវ សេកមាស ស្ថិតក្នុងស្រុកជើងព្រៃ។
ជាមួយគ្នានោះ លោកបណ្ឌិតប្រតិភូក៏បានចុះពិនិត្យទីតាំងដាំបន្លែលក្ខណៈគ្រួសារ ២ កន្លែងទៀត ដែលស្ថិតនៅក្រោមគម្រោងកម្ចីឥណទានខ្នាតតូចរបស់ធនាគារ ARDB ដែលស្ថិតនៅឃុំត្រពាំងឫស្សី ខេត្តកំពង់ធំ។
នៅថ្ងៃបន្ទាប់មក លោកបណ្ឌិត កៅ ថាច ព្រមទាំងសហការី បានអញ្ជើញចុះពិនិត្យទីតាំងផលិតជីកសិកម្មរបស់ក្រុមហ៊ុន Husk Ventured ដែលមានទីតាំងស្ថិតនៅ ភូមិបុស្សវែង ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។ ក្នុងឱកាសនោះ លោកបណ្ឌិតក៏បានលើកទឹកចិត្តឱ្យក្រុមហ៊ុនពង្រីកខ្សែចង្វាក់ផលិតកម្មជី ដើម្បីផ្គត់ផ្គង់ទីផ្សារក្នុងស្រុក បន្ថែមទៀត។ ក្រៅពីនេះ ក៏បានបន្តសកម្មភាពចុះពិនិត្យសកម្មភាពប្រមូលទិញ និងស្តុកពោត និងដំឡូងមី នៅតាមទីលានប្រមូលទិញ ឃ្លាំងស្កុក និងឡសម្ងួតពោត និងដំឡូងមី មួយចំនួននៅក្នុងខេត្តឧត្តរមានជ័យ បន្ទាយមានជ័យ បាត់ដំបង និងប៉ៃលិនផងដែរ។
បើតាមលោកបណ្ឌិត ធនាគារ (ARDB) ក្នុងនាមជាធនាគារបម្រើគោលនយោបាយរបស់រាជរដ្ឋាភិបាលបាននិងកំពុងបំពេញបេសកកម្ម ក្នុងការផ្តល់ជូនហិរញ្ញប្បទានដល់គ្រប់តួអង្គ ក្នុងខ្សែច្រវ៉ាក់តម្លៃកសិកម្ម គាំទ្រការអភិវឌ្ឍសេដ្ឋកិច្ចជនបទ នឹងកំពុងឆ្ពោះទៅរកទស្សនវិស័យប្រែក្លាយជាធនាគារមានចីរភាព (Sustainable bank) ដូច ដែលមានចែងក្នុងផែនទីចង្អុលផ្លូវ១០ឆ្នាំរបស់ធនាគារ៕
.png?1744178821)
