ភ្នំពេញ៖ កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ កាលពីថ្ងៃទី ១៥ មិថុនា បានបិទបញ្ចប់ជាផ្លូវការហើយ ក្រោយខកខានអស់រយៈពេលប្រជុំ១២ឆ្នាំ។ក្នុងកិច្ចប្រជុំនេះ កម្ពុជា និងថៃ បានឯកភាពគ្នាលើការងារចំនួន ៤ចំណុច ផ្តោតលើការងារបច្ចេកទេសបោះព្រំដែន ហើយកម្ពុជាបានបដិសេធដាច់ខាតមិនទទួលស្គាល់ផែនទីរបស់ថៃ ដែលគូសដោយឯកតោភាគី ហើយនាំជាប្រភពនាំជម្លោះព្រំដែនរុំារៃមកដល់ពេលបច្ចុប្បន្ន។
មិនដូចតាមការគ្រោងទុកនោះទេ កិច្ចប្រជុំ JBC រយៈពេល២ថ្ងៃ កម្ពុជាដឹកនាំដោយ លោក ឡាំ ជា រដ្ឋមន្ត្រីទទួលបន្ទុក រដ្ឋលេខាធិការដ្ឋានកិច្ចការព្រំដែន និង ភាគីថៃដឹកនាំដោយ លោក Prasas Prasasvinitchai ប្រធានគណៈកម្មការព្រំដែនថៃ តាមក្រុមអ្នកសង្កេតការណ៍ គឺជាកិច្ចប្រជុំដោយមានភាពតានតឹងខ្លាំង និង មានការប្រុងប្រយ័ត្នខ្ពស់ ជាកិច្ចប្រជុំមិនអាចគ្រប់គ្រងពេលវេលាបាននោះទេ ដោយសារនៅមុនកិច្ចប្រជុំផ្លូវការ ភាគីទាំងពីរបានបើកកិច្ចប្រជុំចង្អៀត៥នាក់តទល់គ្នា នាំឱ្យអូសបន្លាយពេលវេលារហូតដល់២ថ្ងៃ ខុសពីផែនការតែបានគ្រោងទុក។
ជាកិច្ចប្រជុំដាច់បាយ និងគ្មានពេលសម្រាក ជាក់ស្តែងក្នុងកិច្ចប្រជុំនៅថ្ងៃទី ១៥ មិថុនា ឆ្នាំ២០២៥ម្សិលមិញ កិច្ចប្រជុំចង្អៀតចាប់ផ្តើមតាំងពីម៉ោង៩ ព្រឹក ចប់នៅម៉ោង២ រសៀល ហើយភាគី កម្ពុជា និងថៃ ចូលក្នុងកិច្ចប្រជុំផ្លូវការ ដើម្បីចុះហត្ថលេខាលើកំណត់ហេតុ៤ ចំណុច។កិច្ចប្រជុំបានបិទបញ្ចប់នៅម៉ោងប្រមាណ ២ និង ២០នាទី រសៀលថ្ងៃទី ១៥ មិថុនា ពោលគឺប្រជុំផ្លូវការប្រហែលជាង ១០នាទីប៉ុណ្ណោះ។
កំណត់ហេតុនៃកិច្ចប្រជុំ JBC គណៈកម្មការព្រំដែនកម្ពុជា និងថៃ ឯកភាពគ្នាលើការងារវាស់វែង និង បោះបង្គោលព្រំដែន លើតំបន់ឯកភាពគ្នា ដោយអនុវត្តតាមខ្សែទឹក មិនលើកយកបញ្ហាជម្លោះតំបន់ទាំង៤ មាន ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និង តំបន់មុំបី មកជជែកនោះទេ ព្រោះកម្ពុជាសម្រេចដាក់បណ្តឹងទៅតុលាការយុត្តិធម៌អន្តរជាតិ ICJ រួចរាល់ហើយ។តាមប្រភពក្រៅផ្លូវការ ក្នុងកិច្ចប្រជុំនោះ ខាងភាគីថៃបានស្នើសុំឱ្យកម្ពុជាពិចារណា ចំពោះបណ្តឹងនេះ ហើយសុំដាក់ចូលក្នុងកិច្ចប្រជុំ តែត្រូវបានកម្ពុជាច្រានចោល។
ក្នុងកិច្ចប្រជុំ លោក ឡាំ ជា បានប្រាប់់ភាគីថៃពីការដំណើរការនៃការដាក់ពាក្យបណ្តឹងរបស់កម្ពុជា ទៅកាន់ទៅតុលាការយុត្តិធម៌អន្តរជាតិ ICJ លើជម្លោះព្រំដែនចំនួន៤ទីតាំង ទោះបីថៃបដិសេធ និង បានប្រកាសជំហរនឹងមិនលើកយកប្រធានបទតំបន់ទាំង៤នេះ មកជជែកក្នុងកិច្ចប្រជុំលើកក្រោយទៀតទេ។ចំណែកក្រៅពីតំបន់ទាំង៤ កម្ពុជានៅតែប្រកាន់ជំហរ និង សុច្ឆន្ទៈ ក្នុងការបន្តកិច្ចសហការចរចា។
ជាមួយគ្នានោះ ភាគីកម្ពុជា បានប្រកាសបដិសេធយ៉ាងដាច់ខាត មិនទទួលស្គាល់ផែនទីដែលថៃបានគូសជា ឯកតោភាគី ហើយយកមកប្រើប្រាស់ជាសំអាង ដែលកម្ពុជាចាត់ទុកថា ជាប្រភពចម្បងនាំមកនូវជម្លោះដ៏រុំារៃ នាពេលកន្លងមកក៏ដូចជាពេលបច្ចុប្បន្ន និង ទៅអនាគត។កម្ពុជាប្រកាន់យកផែនទីដែលបានឯកភាពគ្នាដូចមានចែងក្នុង MOU ឆ្នាំ២០០០ ជាប្រភេទផែនទីមាត្រដ្ឋាន ១/២០០.០០០ ស្របតាមស្មារតីនៃអនុសញ្ញាបារាំង-សៀម ឆ្នាំ១៩០៤ និង សន្ធិសញ្ញា បារាំង-សៀម ឆ្នាំ១៩០៧ ដើម្បីអនុវត្តការងារខណ្ឌសីមា និង បោះបង្គោលព្រំដែន៕
.png?1744178821)
