អតីតនាយករដ្ឋមន្រ្តីថៃទទួលមរណភាពក្នុងវ័យ៩១ឆ្នាំ

ថៃ៖ លោកឧត្តមសេនីយ Suchinda Kraprayoon នាយករដ្ឋមន្ត្រីទី ១៩ របស់ប្រទេសថៃ និងជាឥស្សរជនកណ្តាលក្នុងរដ្ឋប្រហារយោធាឆ្នាំ ១៩៩១ បានទទួលមរណភាពកាលពីព្រឹក ថ្ងៃទី ១០ ខែមិថុនា ឆ្នាំ ២០២៥ នៅមន្ទីរពេទ្យ Phramongkutklao ក្នុងទីក្រុងបាងកកក្នុងវ័យ៩១ឆ្នាំ។

លោក ស៊ូជីនដា កើតនៅថ្ងៃទី ៦ ខែសីហា ឆ្នាំ១៩៣៣ ជាមន្ត្រីយោធាជាន់ខ្ពស់ និងជានាយករដ្ឋមន្ត្រីទី១៩នៃប្រទេសថៃ។ លោកធ្លាប់កាន់តំណែងជារដ្ឋមន្ត្រីក្រសួងការពារជាតិ អគ្គមេបញ្ជាការកងទ័ពភូមិន្ទថៃ និងជាអគ្គមេបញ្ជាការនៃកងកម្លាំងប្រដាប់អាវុធផងដែរ។ លោក ស៊ូជីនដា បានបញ្ចប់ការសិក្សាពីរាជបណ្ឌិត្យសភាយោធា Chulachomklao ។ លោកក៏ធ្លាប់ហ្វឹកហាត់ជាមេបញ្ជាការកងវរសេនាតូចកាំភ្លើងធំនៅ Fort Sill រដ្ឋ Oklahoma សហរដ្ឋអាម៉េរិក ហើយក្រោយមកបានបញ្ចប់ការសិក្សាថ្នាក់កំពូល បញ្ជាការកងទ័ពជើងគោកថៃ។

លោក ឧត្តមសេនីយ Suchinda Kraprayoon បានក្លាយជានាយករដ្ឋមន្ត្រីថៃជាផ្លូវការនៅថ្ងៃទី ៧ ខែមេសា ឆ្នាំ ១៩៩២។ លោកបានដឹកនាំរដ្ឋប្រហារយោធានៅខែកុម្ភៈ ឆ្នាំ ១៩៩១ ដោយផ្តួលរំលំនាយករដ្ឋមន្ត្រីចាំផ្ទះលោក Chatichai Choonhavan ។ ដំបូងលោកបានសន្យាថានឹងមិនយកតំណែងនាយករដ្ឋមន្ត្រីឡើយតែបន្ទាប់ពីការបោះឆ្នោតសកលឆ្នាំ ១៩៩២ ដែលបង្កឱ្យមានការតវ៉ាយ៉ាងខ្លាំងក្លាដែលឈានដល់ការបះបោរ Black May ទើបបង្ខំឲ្យលោកក្លាយជានាយករដ្ឋមន្រ្តីទី១៩បានត្រឹមតែ ៤៨ ថ្ងៃប៉ុណ្ណោះ ដោយបានលាលែងពីតំណែងនៅថ្ងៃទី ២៤ ខែឧសភា ឆ្នាំ ១៩៩២ បន្ទាប់ពីមានសម្ពាធពីសាធារណជន និងការអន្តរាគមន៍ពីព្រះមហាក្សត្រ Bhumibol Adulyadej៕