ទូតចិននៅកម្ពុជាប្រើបណ្តាញសង្គមជួយផ្សាយពី«កសិផល និងវិស័យទេសចរណ៍ខ្មែរ»ទៅកាន់អន្តរជាតិ

លោក វ៉ាង វិនប៊ីន(Wang Wenbin) ចុះទៅចម្កាទុរេនខេត្តកំពត។

ភ្នំពេញ៖ ឯកអគ្គរដ្ឋទូតចិនប្រចាំនៅកម្ពុជាលោក វ៉ាង វិនប៊ីន(Wang Wenbin) ទទួលបានការចាប់អារម្មណ៍ពីអ្នកប្រើប្រាស់បណ្តាញសង្គមខ្មែរ ក្រោយពីលោកតែងតែបានចុះទៅដល់កន្លែងរស់នៅរបស់ប្រជាជនខ្មែរ ហើយមិនភ្លេចកោតសរសើរពីផលិតផល ក្នុងវិស័យកសិកម្ម វិស័យទេសចរណ៍ និង វិស័យនានារបស់ប្រទេសកម្ពុជា។ឥរិយាបថរបស់លោក គឺទទួលការគោរព និង សាទរពីអ្នកប្រើប្រាស់បណ្តាញសង្គមនៅកម្ពុជា ហើយជំរុញឱ្យទំនាក់ទំនងកម្ពុជា-ចិនកាន់តែរឹងមាំបន្ថែមទៀត។

លោក វ៉ាង វិនប៊ីន(Wang Wenbin) វ័យ ៥៣ ឆ្នាំ ត្រូវបានតែងតាំងជាឯកអគ្គរដ្ឋទូតចិនប្រចាំប្រទេសកម្ពុជា កាលពីខែ មិថុនា ឆ្នាំ ២០២៤។ក្នុងនាមជាអ្នកការទូតតំណាងប្រទេសចិន លោកបានប្រើប្រាស់បណ្តាញសង្គមផ្លូវការរបស់លោក ដើម្បីជួយផ្សព្វផ្សាយពីប្រទេសកម្ពុជាទៅកាន់ឆាកអន្តរជាតិ ជាពិសេស ការផ្សព្វផ្សាយពី វិស័យទេសចរណ៍ កសិកម្ម ការអភិវឌ្ឍនៅក្នុងប្រទេសកម្ពុជា។

ខែពិសាខនៅកម្ពុជា ជារដូវចាប់ផ្តើមធ្លាក់ភ្លៀង និង ចូលដល់ខែទុរេន លោកបានធ្វើឡើងទៅកាន់ខេត្តកំពត ជាខេត្តល្បីល្បាយថាទុរេនឆ្ងាញ់ ដើម្បីទស្សនកិច្ចចម្ការទុរេន។ក្នុងទស្សនកិច្ចនោះ បានថ្លែងសរសើរពី «ទុរេនអៅខាក់»កម្ពុជា ដោយចាត់ទុកថា ជាទុរេនឆ្ងាញ់ជាងគេលើពិភពលោក។លោក ជឿជាក់ថាទុរេនខ្មែរឆ្ងាញ់កាន់តែច្រើននឹងត្រូវនាំចេញទៅកាន់ប្រទេសចិននាពេលអនាគត។សារបង្ហោះនេះ ទទួលបានការចែករំលែកពីប្រជាពលរដ្ឋខ្មែរជាច្រើន អមជាមួយការអរគុណ។

មួយថ្ងៃក្រោយមក លោក វ៉ាង វិនប៊ីន (Wang Wenbin) បានបង្ហោះវីដេអូមួយទៀត ក្រោមចំណងជើងថា "ស្វាគមន៍មកភ្លក្សស្វាយកែវចិនដ៏ឈ្ងុយឆ្ងាញ់ និង ទស្សនាទេសភាពកម្ពុជាដ៏ស្រស់ស្អាត!"។ ក្នុងវីដេអូនោះ លោកថា ជួយប្រម៉ូតស្វាយកែវចិនរបស់កម្ពុជា ហើយបានអំពាវនាវឱ្យទេសចរចិន ធ្វើដំណើរមកកម្ពុជា ហើយកុំភ្លេចភ្លក់ស្វាយកែវចិនរបស់កម្ពុជា។

ទាំងនេះ គឺជាសកម្មភាពខ្លះៗនៃការចូលរួមសកម្មភាពរបស់លោក ដើម្បីជួយផ្សព្វផ្សាយប្រទេសកម្ពុជា ខណៈកន្លងមកមានវីដេអូជាច្រើនទៀត លោកបានចូលរួមជួយផ្សព្វផ្សាយលើតម្លៃនៃប្រទេសកម្ពុជា ទៅកាន់ឆាកអន្តរជាតិ។

តាមរយៈសកម្មភាពរបស់ទូតចិននេះ ត្រូវបានគេមើលឃើញថា នឹងផ្តល់ប្រសិទ្ធភាពផ្នែកពាណិជ្ជកម្មដោយជំរុញឱ្យប្រជាជនចិនចាប់អារម្មណ៍ និង ទទួលស្គាល់លើផលិតផលកសិកម្មរបស់កម្ពុជា បង្កើតបាននូវនយោបាយទន់ (soft power) បង្កើនភាពជឿជាក់រវាងប្រជាជន និង ប្រជាជននៃប្រទេសទាំង២ ពង្រឹងកិច្ចសហប្រតិបត្តិការកាន់តែរឹងមាំរបស់កម្ពុជា-ចិន។

គួរបញ្ជាក់ថា លោក Wang Wenbin វ័យ ៥៣ ឆ្នាំ បានទទួលការតែងតាំងពីរដ្ឋាភិបាលរបស់លោកប្រធានាធិបតីចិន Xi Jinpin ឱ្យមកបំពេញការងារជាឯកអគ្គរដ្ឋទូតចិនប្រចាំកម្ពុជាជំនួសលោក Wang Wentian ។ លោកមានបទពិសោធន៍ការទូតជាង ៣០ ឆ្នាំ និង ធ្លាប់ជាឯកអគ្គរដ្ឋទូតនៅប្រទេស Tunisia និង ជាអតីតអ្នកនាំពាក្យក្រសួងការបរទេសចិន៕