.png?1741682398)
ព្រះសីហនុ៖ ក្រុមហ៊ុន BYD ជាក្រុមហ៊ុនផលិតរថយន្តអគ្គិសនីឈានមុខគេនៅលើពិភពលោករបស់ចិន នៅថ្ងៃទី ២៨ មេសានេះ បានបើកការដ្ឋានសាងសង់រោងចក្រដំឡើងរថយន្ត BYD CAMBODIA នៅតំបន់សេដ្ឋកិច្ចពិសេសក្រុងព្រះសីហនុ។ក្រុមហ៊ុន នឹងបណ្ដាក់ទុនប្រមាណ ៣២លានដុល្លារ សម្រាប់ដំណាក់កាលទី១ លើការបង្កើតរោងចក្រផ្គុំដំឡើងយានយន្តប្រភេទ CKD សម្រាប់ដំឡើងរថយន្តអគ្គិសនីសុទ្ធ (EV) និង អគ្គិសនីលាយសាំង (PHEV) រោងចក្រនេះមានសមត្ថភាពដំឡើងរថយន្តប្រមាណ ១០ ០០០គ្រឿង ក្នុងមួយឆ្នាំ។
យោងតាមរបាយការណ៍ រោងចក្រដំឡើងរថយន្ត BYD Cambodia គ្រោងនឹងបញ្ចប់ការសាងសង់នៅខែតុលា និង ចាប់ផ្តើមដំណើរការផលិតកម្មដំឡើងរថយន្តអគ្គិសនីជាលើកដំបូងនៅ កម្ពុជា នាដើមខែវិច្ឆិកា ឆ្នាំ២០២៥ ខាងមុខនេះ។ លោក ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា វត្តមានរបស់ក្រុមហ៊ុន BYD នៅកម្ពុជានេះ បង្ហាញឱ្យឃើញពីការជឿទុកចិត្តរបស់វិនិយោគិនមកលើរាជរដ្ឋាភិបាលកម្ពុជា រួមជាមួយនឹងកត្តាសំខាន់ៗដូចជា៖ (១)កត្តាសុខសន្តិភាព ស្ថេរភាពនយោបាយ និង ម៉ាក្រូសេដ្ឋកិច្ច (២)លក្ខខណ្ឌល្អប្រសើរនៃក្របខណ្ឌច្បាប់ និងលិខិតបទដ្ឋានគតិយុត្ត និង (៣)ការបើកចំហសេដ្ឋកិច្ចទទួលការវិនិយោគស្ទើរលើគ្រប់វិស័យ។
សម្តេច ហ៊ុន ម៉ាណែត នាយករដ្ឋមន្ត្រីនៅកម្ពុជា ធ្លាប់បានប្រកាសអបអរសាទរ ការបើករោងចក្រនៅកម្ពុជារបស់ក្រុមហ៊ុន BYD ខណៈកម្ពុជាក៏មានក្រុមហ៊ុនធំៗដូចជាក្រុមហ៊ុន ford ក្រុមហ៊ុន Toyota ក្រុមហ៊ុន ហាយាន់ដាយ របស់ជប៉ុនជាដើម។សម្រាប់សម្តេច ក្រុមហ៊ុនធំៗទាំងនោះ នឹងផ្សារភ្ជាប់ជាមួយសង្វាក់ផ្គត់ផ្គង់ក្នុងប្រទេសកម្ពុជា ហើយប្តេជ្ញាបន្តខិតខំទាក់ម៉ូយ(បន្តទាក់ទាញអ្នកវិនិយោគគិន)មកវិនិយោគបន្ថែមទៀត។
រយៈពេល ៣ខែ ដើមឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ១៧២គម្រោង ក្នុងទុនវិនិយោគប្រមាណ ២,៥ ប៊ីលានដុល្លារអាម៉េរិក បង្កើតការងារបានចំនួនជិត ១២ម៉ឺនកន្លែង។បច្ចុប្បន្ន ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគបង្កើតតំបន់សេដ្ឋកិច្ចពិសេសចំនួន ៥៥គម្រោង ក្នុងទំហំទុនវិនិយោគប្រមាណ៥ពាន់លានដុល្លារអាម៉េរិក ក្នុងនោះតំបន់សេដ្ឋកិច្ចពិសេសដែលកំពុងដំណើរការមានចំនួន ៣២តំបន់ ស្រូបទាញគម្រោងវិនិយោគចំនួន ៩០៣គម្រោង ក្នុងទំហំទុនវិនិយោគ ប្រមាណ ១២,៤ពាន់លានដុល្លារអាម៉េរិក និងបង្កើតការងារបានចំនួនប្រមាណ ២០ម៉ឺនកន្លែង។
ដោយឡែក តំបន់សេដ្ឋកិច្ចពិសេសដែលមានទីតាំងស្ថិតនៅក្នុងខេត្តព្រះសីហនុ មានចំនួន ១៣តំបន់ ក្នុងនោះ តំបន់សេដ្ឋកិច្ចពិសេសដែលកំពុងដំណើរការមានចំនួន ៥តំបន់ ដោយបានទាក់ទាញគម្រោងវិនិយោគមកបណ្តាក់ទុននៅក្នុងតំបន់ទាំងនោះចំនួន ៣៣៨គម្រោង ក្នុងទំហំទុនវិនិយោគសរុបប្រមាណ ៥ពាន់លានដុល្លារអាម៉េរិក និងបង្កើតការងារបានប្រមាណជាង ៤ម៉ឺនកន្លែង។ រីឯនៅ នៅក្នុងតំបន់សេដ្ឋកិច្ចពិសេសក្រុងព្រះសីហនុ គិតចាប់ពីដំណើរការមកដល់បច្ចុប្បន្ន ក.អ.ក បានអនុម័តគម្រោងវិនិយោគសរុបចំនួន ២៧៧ គម្រោង ក្នុងទុនវិនិយោគប្រមាណ ១,៨ ពាន់លានដុល្លារអាមេរិក ដែលក្នុងនោះមានគម្រោងវិនិយោគចំនួនប្រមាណ ១១១ កំពុងដំណើរការ ក្នុងទំហំទុនវិនិយោគប្រមាណ ៩០៤ លានដុល្លារអាមេរិក ដែលបានស្រូបយកកម្លាំងពលកម្មប្រមាណ២៨ ១៦០ កន្លែង និងប្រមាណ ៦៥ គម្រោងកំពុងសាងសង់រោងចក្រ និងបំពាក់គ្រឿងម៉ាស៊ីន៕
.png?1744178821)
