ចិនប្រាប់ឲ្យអាម៉េរិកដកពន្ធថ្មីចេញជាបន្ទាន់ បើមិនដូចច្នេះនឹងទទួលការសងសឹក

ចិន៖ ប្រទេសចិនបានប្រាប់ឱ្យសហរដ្ឋអាម៉េរិកដកពន្ធដែលដាក់ថ្មីលើទំនិញចិនជាបន្ទាន់ ដោយប្រទេសចិនបានថ្កោលទោសវិធានការនេះថាជាការគំរាមកំហែងឯកតោភាគីនិងប្តេជ្ញាអនុវត្តវិធានការតបតដើម្បីការពារផលប្រយោជន៍របស់ខ្លួន។ ការឆ្លើយតបនេះធ្វើឡើងបន្ទាប់ពីការប្រកាសរបស់លោកប្រធានាធិបតី Donald Trump កាលពីថ្ងៃទី ៣ ខែមេសា ឆ្នាំ ២០២៥ អំពីការបន្ថែមពន្ធទៅវិញទៅមករួមទាំងដាក់ពន្ធបន្ថែមឡើងដល់ ៣៤% លើការនាំចេញរបស់ចិន ដែលបង្កើនពន្ធសរុបដល់ ៥៤% នៃការយកពន្ធលើទំនិញចិននាំចូលសហរដ្ឋអាម៉េរិក។

យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មចិនបានបញ្ជាក់ថា សកម្មភាពទាំងនេះរបស់អាម៉េរិករំខានដល់ពាណិជ្ជកម្មអន្តរជាតិយ៉ាងធ្ងន់ធ្ងរ និងប៉ះពាល់ដល់ស្ថិរភាពសេដ្ឋកិច្ចពិភពលោក។ ជាការសងសឹក ចិនគ្រោងនឹងចាត់វិធានការចាំបាច់ដើម្បីការពារផលប្រយោជន៍របស់ខ្លួន ដែលអាចរាប់បញ្ចូលទាំងការកំណត់គោលដៅផលិតផលកសិកម្មរបស់អាម៉េរិក និងវិស័យផ្សេងៗទៀត។ចិនក៏បានជំរុញឲ្យសហរដ្ឋអាមេរិកលុបចោលការដំឡើងពន្ធថ្មីនេះ និងដោះស្រាយចំណុចខុសគ្នាជាមួយដៃគូពាណិជ្ជកម្មរបស់ខ្លួនឲ្យបានត្រឹមត្រូវតាមរយៈកិច្ចសន្ទនា ដោយស្មើភាពគ្នាជៀងវាសការរំខានដល់ពាណិជ្ជកម្មពិភពលោក និងឈានដល់សង្រ្គាមពាណិជ្ជកម្មសារជាថ្មី។

ពន្ធឆ្លើយតប(Reciprocal Tariff )ចំនួន៣៤% ទៅលើពន្ធដែលអាម៉េរិកបានដំឡើងហើយស្រាប់ ២០% លើការនាំចូលទាំងអស់របស់ចិនទៅកាន់សហរដ្ឋអាម៉េរិកជារួមអាម៉េរិកយកពន្ធសរុប ៥៤%លើទំនិញចិនដែលជាចំនួនមួយយ៉ាងច្រើនសន្ធឹកសន្ធាប់ដែលបង្កការប៉ះពាល់ដល់ទីផ្សារចិន និងពិភពលោកជាខ្លាំង។

ក្រៅពីចិនប្រទេសផ្សេងទៀតក៏បានរិះគន់ពន្ធអាម៉េរិកផងដែរ ប្រធានគណៈកម្មការអឺរ៉ុបលោកស្រី Ursula von der Leyen បានព្រមានអំពីផលវិបាកសេដ្ឋកិច្ចពិភពលោកដ៏ធ្ងន់ធ្ងរ ហើយបានបង្ហាញពីវិធានការណ៍ដើម្បីឆ្លើយតបទៅអាម៉េរិកវិញ។ សម្ព័ន្ធមិត្តដូចជាជប៉ុន និងអូស្ត្រាលីបានសម្តែងការសោកស្ដាយ និងបានអំពាវនាវឱ្យមានការពិភាក្សាដើម្បីដោះស្រាយភាពតានតឹងពាណិជ្ជកម្មដែលកំពុងកើនឡើង។

គួរបញ្ជាក់ថាពន្ធថ្មីនេះគ្រោងនឹងចូលជាធរមាននៅថ្ងៃទី ៥ ខែមេសា ឆ្នាំ ២០២៥។ អ្នកវិភាគព្រមានថាការកើនឡើងនេះអាចធ្វើឲ្យខ្សែសង្វាក់ផ្គត់ផ្គង់សកលមានអស្ថិរភាព និងបង្កើនការចំណាយសម្រាប់អ្នកប្រើប្រាស់ទូទាំងពិភពលោក៕