នាយករដ្ឋមន្រ្តីថៃ ប្រាប់ពលរដ្ឋកុំឲ្យបារម្ភ«ពន្ធអាម៉េរិក៣៦%»ដោយពេលនេះមន្រ្តីជំនាញកំពុងព្យាយាមចចារ

ថៃ៖ នាយករដ្ឋមន្ត្រីថៃលោកស្រី Paetongtarn Shinawatra បានធានានូវវិធានការឆ្លើយតប រួមទាំងការកែសម្រួលពន្ធ និងក្រុមចរចា សំដៅសម្របសម្រួល និងទប់ស្កាត់ផលប៉ះពាល់ណាមួយលើផលិតផលក្នុងស្រុក។ នាយករដ្ឋមន្ត្រី បានធានាជាថ្មីថា មិនចាំបាច់ព្រួយបារម្ភអំពីសហរដ្ឋអាម៉េរិក ការដំឡើងពន្ធ ៣៦% លើការនាំចូលរបស់ថៃនោះទេ ដោយសារតែវិធានការនានាមានរួចហើយ ដើម្បីដោះស្រាយបញ្ហានេះ។

ការដំឡើងពន្ធនាំចូល ៣៦% របស់សហរដ្ឋអាម៉េរិកលើផលិតផលថៃ លោកស្រី Paetongtarn បានលើកឡើងថា ប្រទេសថៃ ត្រូវការកែសម្រួលរចនាសម្ព័ន្ធពន្ធនាំចូលរបស់ខ្លួនជាមួយសហរដ្ឋអាម៉េរិក និង បង្កើតក្រុមការងារសម្រាប់ការចរចាដោយមានទំនុកចិត្តថា ការពិភាក្សាអាចផ្តល់លទ្ធផលអំណោយផល។ ខណៈដែលប្រទេសថៃ រងផលប៉ះពាល់ក្នុងបរិមាណច្រើន ដោយសារពន្ធខ្ពស់បានធ្វើឱ្យប្រទេសនេះ ស្ថិតក្នុងចំណោមប្រទេសដែលរងផលប៉ះពាល់ខ្លាំងបំផុត។ ដូច្នេះ ទាំងផែនការរយៈពេលខ្លី និង រយៈពេលវែងថៃកំពុងត្រូវបានរៀបចំ។ ក្នុងរយៈពេលខ្លី ការចរចានឹងផ្តោតលើការជួយអ្នកនាំចេញ និងកាត់បន្ថយផលប៉ះពាល់។ បច្ចុប្បន្នក្រសួងហិរញ្ញវត្ថុ និងក្រសួងពាណិជ្ជកម្មថៃ កំពុងធ្វើការដោះស្រាយ។

ទាក់ទិននឹងការដឹកនាំក្នុងការចរចា នាយករដ្ឋមន្ត្រីថែ បានបញ្ជាក់ថា បច្ចុប្បន្នបញ្ហានេះ ស្ថិតក្រោមការត្រួតពិនិត្យរបស់លេខាធិការអចិន្ត្រៃយ៍នៃក្រសួងពាណិជ្ជកម្ម និងក្រសួងហិរញ្ញវត្ថុ។ លោកស្រីបានកត់សម្គាល់ថា តំណាងដែលចូលរួមក្នុងការពិភាក្សានឹងអាស្រ័យលើកម្រិតនៃការចរចា ព្រោះមានច្រើនដំណាក់កាល។ ចំពោះ ការវាយតម្លៃផលប៉ះពាល់ នាយករដ្ឋមន្ត្រី ពន្យល់ថា បញ្ហាពន្ធរបស់អាម៉េរិកនៅតែអាចចរចារបាន ប្រសិនបើរចនាសម្ព័ន្ធពន្ធដារអាចត្រូវបានកែសម្រួលឱ្យមានភាពសមហេតុផលជាងនេះ។

លោកស្រីបានបញ្ជាក់ថា ការត្រួតពិនិត្យដ៏ទូលំទូលាយមួយកំពុងដំណើរការដឹកនាំដោយ លោក Phansak Vinyaratn ទីប្រឹក្សាគោលនយោបាយរបស់នាយករដ្ឋមន្ត្រី ស្តីពីពាណិជ្ជកម្មសហរដ្ឋអាម៉េរិក ដែលត្រួតពិនិត្យការនាំចូល និង ការនាំចេញទាំងអស់។ វិធានការថ្មីត្រូវបានគេរំពឹងថា នឹងប្រកាសក្នុងពេលឆាប់ៗនេះ៕