ពូទីនចុះក្រឹត្យប្រកាសកេណ្ឌ«ទ័ពថ្មី»១៦ម៉ឺននាក់

រុស្ស៊ី៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាលើក្រឹត្យក្នុងការជ្រើសរើសទាហានថ្មីចំនួន ១៦០,០០០ នាក់ ឱ្យចូលបម្រើយោធាដោយចូលជាធរមានចាប់ពីថ្ងៃទី ១ ខែមេសា ដល់ពាក់កណ្តាលខែកក្កដា ឆ្នាំ ២០២៥។ ការប្រកាសកេណ្ឌទ័ពថ្មីនេះគឺតម្រូវជ្រើសយកពលរដ្ឋរុស្ស៊ីដែលមានអាយុពី ១៨ ទៅ ៣០ ឆ្នាំ។

វិមានក្រឹមឡាំង និងក្រសួងការពារជាតិរុស្ស៊ី បានបញ្ជាក់ថាចំនួនទាហានថ្មីនេះគឺចូលផ្នែកទាហានជើងទឹក នឹងមិនត្រូវបានដាក់ពង្រាយទៅកាន់តំបន់ប្រយុទ្ធឡើយ ហើយថាហើយក្រឹត្យថ្មីនេះមិនពាក់ព័ន្ធនឹងជម្លោះដែលកំពុងបន្តនៅអ៊ុយក្រែនឡើយ។

កាលពីខែកញ្ញាឆ្នាំ ២០២៤ លោកពូទីនក៏ធ្លាប់បានបញ្ជាឱ្យរើសទាហានចំនួន ១៣៣,០០០ នាក់ក្នុងអំឡុងពេលរដូវស្លឹកឈើជ្រុះ។ លើសពីនេះទៀត នៅក្នុងខែតុលា ឆ្នាំ ២០២៤ ប្រទេសរុស្ស៊ីបានប្រកាសដំឡើង ៣០% នៃថវិកាការពារជាតិរបស់ខ្លួនសម្រាប់ឆ្នាំ ២០២៥ ដើម្បីពង្រឹងវិស័យ និងពន្លឿនវិស័យយោធារបស់ខ្លួន៕