.png?1741682398)
ភ្នំពេញ៖ ប្រមុខរាជរដ្ឋាភិបាលកម្ពុជា សម្តេច ហ៊ុន ម៉ាណែត នៅថ្ងៃទី ២០ មីនានេះ បានប្រកាសលាតត្រដាងជាសាធារណៈពីសំណើរមួយដែលស្នើសុំឱ្យរាជរដ្ឋាភិបាលកម្ពុជាបង្រួមក្រសួងចំនួន៣បញ្ចូលគ្នា ដើម្បីកាត់បន្ថយការចំណាយ និង ធ្វើការជាន់គ្នា។ប៉ុន្តែសំណើរនេះ ត្រូវបានសម្តេចបដិសេធ តែប្តូរមកវិញនូវការពង្រឹងគុណភាពការងារ ដោយផ្តោតលើទ្រឹស្តី«ពង្រឹងជាជាងពង្រីកបន្ថែម»។
ថ្លែងក្នុង“បិទសន្និបាតបូកសរុបលទ្ធផលការងារឆ្នាំ២០២៤ និង លើកទិសដៅការងារឆ្នាំ២០២៥ របស់ក្រសួងមុខងារសាធារណៈ” សម្តេច ហ៊ុន ម៉ាណែត បានលើកយកពីបទពិសោធន៍នៅបរទេសក្នុងរយៈពេលជាង១ខែ ក្រោមការដឹកនាំដោយប្រធានាធិបតីថ្មី អាម៉េរិក បានកាត់មន្រ្ដីរាជការចេញជាង២០ម៉ឺននាក់ ដឹកនាំដោយលោក Elon Musk រដ្ឋមន្រ្តីក្រសួង ប្រសិទ្ធភាពរដ្ឋាភិបាល (DOGE) ដើម្បីពង្រឹងការដឹកនាំរដ្ឋបាលសាធារណៈរបស់គេ និងបទពិសោធន៍ប្រទេសទេសជាច្រើនទៀតបូករួមទាំងវៀតណាមក្បែរខាងកម្ពុជាផង។
បើតាមសម្តេច នៅកម្ពុជាមិនមានផែនការកាន់បន្ថយមន្ត្រី ឬពង្រួមក្រសួងស្ថាប័ននោះទេ ពោលគឺកម្ពុជាមានការអនុវត្តវិធីសាស្រ្ដផ្សេង ដើម្បីដឹកនាំឱ្យវិស័យមុខងារនេះមានប្រសិទ្ធភាព គឺអនុវត្តអភិក្រម «ពង្រឹងជាជាងពង្រីក» គឺមិនឱ្យមានការពង្រីកចំនួនមន្រ្ដីរាជការដែលមិនចាំបាច់ឡើយ។
ជាមួយគ្នានោះ សម្តេច ហ៊ុន ម៉ាណែត ក៏បានលាតត្រដាងពីសំណើរមួយក្នុងពេលសម្តេចចុះទៅទស្សនកិច្ចក្នុងខេត្តកំពង់ធំ ដែលចង់បង្រួមក្រសួងចំនួន៣បញ្ចូលគ្នាទៅជាក្រសួងតែមួយ ក្នុងនោះមានជាអាទិ៍ ក្រសួងកសិកម្ម ក្រសួងធនធានទឹក និង ក្រសួងអភិវឌ្ឍជនបទ។តែយ៉ាងណាសម្តេច ហ៊ុន ម៉ាណែត នៅតែព្រមានអនុវត្តកាត់បន្ថយមន្ត្រី ឬបង្រួម ក្នុងករណីចាំបាច់ណាមួយ។
គួរបញ្ជាក់ថា បច្ចុប្បន្នមន្ត្រីរាជការស៊ីវិលរបស់កម្ពុជានៅទូទាំងប្រទេស មានចំនួនសរុប ២៣២,០៣៤ នាក់ (ស្ត្រី ៩៦,៩៦៩នាក់) ស្មើនឹង ១០០% ក្នុងនោះ ថ្នាក់ជាតិ ៥៤,៥៨៥នាក់ (ស្រី ១៦,៦៧៦នាក់) ស្មើនឹង ២៣.៥២% និងថ្នាក់ក្រោមជាតិ ១៧៧,៨៤៩នាក់ (ស្ត្រី ៨១,៣១២នាក់) ស្មើ និង ៧៦.៥៣%។ នេះបើយោងតាមរបាយការណ៍ក្រសួងមុខងារសាធារណៈ៕
