.png?1741682398)
ភ្នំពេញ៖ ប្រទេសកម្ពុជា និងប្រទេសថៃ នឹងរៀបចំ«ព្រឹត្តិការណ៍កីឡាបាល់ទាត់មិត្តភាពកម្ពុជា-ថៃ»នៅថ្ងៃទី ៨ មីនាស្អែកនេះ ដើម្បីអបអរសាទរខួបអនុស្សាវរីយ៍លើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ នៅពហុកីឡដ្ឋានជាតិអូឡាំពិក។ពិធីប្រកួតនេះ រៀបចំឡើងក្រោមអធិបតីភាពពីថ្នាក់ដឹកនាំនៃក្រសួងការបរទេសកម្ពុជា និងភាគីរបស់ប្រទេសថៃ។
ព្រឹត្តិការណ៍កីឡាបាល់ទាត់មិត្តភាពកម្ពុជា-ថៃ ដើម្បីអបអរសាទរខួបអនុស្សាវរីយ៍លើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ នឹងរៀបចំឡើងចំនួន២ប្រកួត គឺ ក្រុមទី១ ក្រុមបាល់ទាត់តារាកម្ពុជា នឹងប្រកួតជាមួយក្រុមបាល់ទាត់តារាថៃក្រុមទី២ ក្រុមបាល់ទាត់គុនខ្មែរ ប្រកួតជាមួយក្រុមបាល់ទាត់ MUAYTHAI។
ការប្រកួតនេះ រៀបចំឡើងដោយមានលោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា និង រដ្ឋមន្រ្តីក្រសួងការបរទេសនៃព្រះរាជាណាចក្រថៃ អញ្ជើញចូលរួមជាសហអធិបតី ជាមួយនឹងការផ្សាយផ្ទាល់ពីទូរទស្សន៍បាយ័ន និងទូរទស្សន៍របស់ថៃ ដើម្បីឱ្យប្រជាពលរដ្ឋថៃបានទស្សនាព្រមៗគ្នា ជាមួយប្រជាពលរដ្ឋកម្ពុជា។
បើតាមគម្រោងការប្រកួតកីឡាបាល់ទាត់កម្ពុជា-ថៃនេះ គឺជាការប្រកួតមិត្តភាព ដែលមានកីឡាករ និង តារាល្បីៗរបស់ថៃ និង កីឡាករ និងតារាល្បីៗរបស់កម្ពុជា ចូលរួមជាច្រើននាក់ ក្នុងគោលបំណងរិតចំណងសាមគ្គីភាព មិត្តភាព កាន់តែល្អប្រសើរថែមទៀត។
គួរបញ្ជាក់ថា នៅថ្ងៃទី២៤ កញ្ញា ឆ្នាំ២០១១ កម្ពុជា និងថៃ ធ្លាប់បានរៀបចំ«ព្រឹត្តិការណ៍កីឡាបាល់ទាត់មិត្តភាពកម្ពុជា-ថៃ»ដោយមន្ត្រីជាន់ខ្ពស់នៃរដ្ឋាភិបាលកម្ពុជា ដែលរួមមានសម្តេច ហ៊ុន សែន អតីតនាយករដ្ឋមន្ត្រីកម្ពុជា សម្តេច ហេង សំរិននិងអតីតនាយករដ្ឋមន្ត្រីថៃ គឺលោក ស៊ុមច័យ វង្សសាវ៉ាត បានចូលរួមជាលក្ខណៈមិត្តភាពដែលបានធ្វើឡើងនៅពាហុកីឡាដ្ឋានជាតិអូឡាំពិក។ការប្រកួតកីឡាបាល់ទាត់មិត្តភាព គឺគ្មានអ្នកចាញ់ និងគ្មានអ្នកឈ្នះនោះទេ៕
.png?1740713959)
