.png?1741682398)
កូរ៉េខាងត្បូង៖ មនុស្សយ៉ាងតិច ១៥ នាក់បានរងរបួសនៅពេលដែលយន្តហោះចម្បាំងកូរ៉េខាងត្បូងពីរគ្រឿងច្រឡំទម្លាក់គ្រាប់បែកលើភូមិមួយដែលមានមនុស្សរស់នៅក្នុងអំឡុងការធ្វើសមយុទ្ធនៅថ្ងៃព្រហស្បតិ៍នេះ។នេះបើយោងតាមទីភ្នាក់ងារព័ត៌មាន Yonhap របស់កូរ៉េខាងត្បូង។
យន្តហោះចម្បាំង KF-16 ពីរគ្រឿង បានទម្លាក់គ្រាប់បែកចំនួន៨គ្រាប់ នៅខាងក្រៅកន្លែងហ្វឹកហាត់ក្នុងអំឡុងពេលសមយុទ្ធបាញ់គ្រាប់ពិត នៅក្នុងការទម្លាក់គ្រាប់បែកខុសដែលមិនធ្លាប់មានពីមុនមកលើទីប្រជុំជនស៊ីវិលមួយ។យន្តហោះចម្បាំងទាំងពីរគ្រឿងនេះបានចូលរួមនៅក្នុងសមយុទ្ធយោធារួមគ្នារវាងសហរដ្ឋអាម៉េរិក និង កូរ៉េខាងត្បូង នៅជិតព្រំដែនរវាងកូរ៉េខាងត្បូង និងកូរ៉េខាងជើង។
យោងតាមទីភ្នាក់ងារព័ត៌មាន Yonhap របស់កូរ៉េខាងត្បូង ក្នុងហេតុការណ៍នេះ បណ្តាលឲ្យមនុស្ស ១៥ នាក់ក្នុងនោះមានទាហាន ២ នាក់ និងជនបរទេសពីរនាក់ រងរបួសស្រាលរហូតដល់ធ្ងន់ធ្ងរ និង បានបំផ្លាញព្រះវិហារមួយ និងអគារចំនួន ៧ផ្សេងទៀត។
អាជ្ញាធររំពឹងថា ចំនួនអ្នករបួសនឹងកើនឡើង ខណៈដែលមនុស្សកាន់តែច្រើនបានស្នើសុំការព្យាបាល អ្នកស្រុកប្រហែល ៥០ នាក់នៅក្នុងតំបន់នេះ បានជម្លៀសឆ្ងាយពីកន្លែងទម្លាក់គ្រាប់បែក។
ទីភ្នាក់ងារព័ត៌មាន Yonhap បានស្រង់សម្តីមន្ត្រីយោធាថា យន្តហោះចម្បាំង KF-16 ចូលរួមក្នុងសមយុទ្ធបាញ់គ្រាប់ពិត "មិនធម្មតា" បានបញ្ចេញគ្រាប់បែក MK-82 ចំនួនបួនគ្រាប់ នៅខាងក្រៅកន្លែងហ្វឹកហ្វឺននៅទីក្រុង Pocheon នៅម៉ោង 10:04 ព្រឹក។ខ្លួនកំពុងធ្វើការស៊ើបអង្កេតលើឧបទ្ទវហេតុនេះ ដែលដឹកនាំដោយអនុប្រធានសេនាធិការ ឧត្តមសេនីយ៍ឯក Park Ki-wan និង បានសុំទោសចំពោះការខូចខាតដល់ជនស៊ីវិល។
កងទ័ពអាកាសបាននិយាយនៅក្នុងសេចក្តីថ្លែងការណ៍មួយថា "យើងមានការសោកស្តាយចំពោះការខូចខាតជនស៊ីវិលពីគ្រោះថ្នាក់នៃការដោះលែង (គ្រាប់បែក) ខុសប្រក្រតី និងសូមជូនពរឱ្យមានការជាសះស្បើយយ៉ាងឆាប់រហ័សនៃអ្នករងរបួស" ។ "យើងនឹងចាត់វិធានការចាំបាច់ទាំងអស់ រួមទាំងសំណងសម្រាប់ការខូចខាត"៕
