អាម៉េរិកផ្អាកការចែករំលែក«ព័ត៌មានសម្ងាត់»ជាមួយអ៊ុយក្រែន

វ៉ាស៊ីនតោន៖ នាយក CIA លោក John Ratcliffe បានគូសបញ្ជាក់ថាសហរដ្ឋអាម៉េរិកសម្រេចផ្អាកការចែករំលែកព័ត៌មានសម្ងាត់ជាមួយអ៊ុយក្រែន ការសម្រេចចិត្តមិនបន្តផ្តល់ព័ត៌មានសម្ងាត់ទៅកាន់អ៊ុយក្រែននេះធ្វើឡើងចំពេលដែអាម៉េរិកបានប្រកាសផ្អាកជំនួយសព្វាវុធគ្រប់ប្រភេទទៅកាន់អ៊ុយក្រែនក្រោយពីមានការប៉ះទង្គិចសំដីរវាងលោកប្រធានាធិបតីត្រាំ និងលោកហ្សេលែនស្គី។

នាយក CIA លោក Ratcliffe បានប្រាប់ Fox News ថាប្រធានាធិបតី Trump មានសំណួរពិតប្រាកដមួយថាតើប្រធានាធិបតី Zelenskyy បានប្តេជ្ញាចិត្តចំពោះដំណើរការសន្តិភាពឬយ៉ាងណា។ លោក Ratcliffe បន្តទៀតថាការផ្អាកជំនួយយោធា និងផ្តល់ព័ត៌សម្ងាត់ដល់អ៊ុយក្រែនគឺជាការផ្អាកបណ្តោះអាសន្ន ហើយសហរដ្ឋអាម៉េរិកនឹងធ្វើការដោះដូរជាមួយអ៊ុយក្រែន។

នៅក្នុងការថ្លែងសុន្ទរកថារបស់លោកត្រាំកាលពីព្រឹកថ្ងៃអង្គារលោកបាននិយាយថាលោក ហ្សេលែនស្គី បានប្រាប់លោកថាអ៊ុយក្រែន បានត្រៀមខ្លួនរួចជាស្រេចសម្រាប់កិច្ចពិភាក្សាជាមួយទីក្រុងមូស្គូ និងការបញ្ចប់កិច្ចព្រមព្រៀងរុករករ៉ែរបស់សហរដ្ឋអាម៉េរិក ហើយលោកបានសម្តែងការសោកស្តាយជុំវិញរឿងរ៉ាវដែលបានផ្ទុះជាមួយលោកដូណាល់ត្រាំ ។

នៅក្នុងលិខិតរបស់លោកហ្សេលែនស្គីនោះ លោក Trump បានប្រាប់សមាជិកសភាអាម៉េរិកថាអ៊ុយក្រែនត្រៀមខ្លួនរួចជាស្រេចដើម្បីមកចរចាឱ្យបានឆាប់តាមដែលអាចធ្វើទៅបាន ដើម្បីជំរុញនូវសន្តិភាពយូរអង្វែងឱ្យកាន់តែឆាប់រហ័ស។ គ្មាននរណាម្នាក់ចង់បានសន្តិភាពច្រើនជាងអ៊ុយក្រែនទេ៕