រដ្ឋបង្កើតគណៈកម្មការ រៀបចំពិធី«បួងសួងចម្រើនសេចក្តីសុខ»ជូនដល់កម្ពុជា

ភ្នំពេញ៖ រាជរដ្ឋាភិបាលកម្ពុជាសម្រេចបង្កើតគណៈកម្មការអន្តរក្រសួង ដើម្បីរៀបចំព្រះរាជពិធីបួងសួងចម្រើនសេចក្តីសុខ ជូនដល់កម្ពុជា ដែលនឹងប្រព្រឹត្តិទៅនៅខែមេសា នៅមុខប្រាសាទអង្គរវត្ត ខេត្តសៀមរាប។

សម្រាប់ការប្រព្រឹត្តិទៅនូវព្រះរាជពិធីបួងសួងចម្រើនសេចក្តីសុខ ជូនដល់កម្ពុជា ឲ្យកាន់តែរលូន រាជរដ្ឋាភិបាលកម្ពុជាសម្រេចបង្កើតគណៈកម្មការអន្តរក្រសួង ដើម្បីចាត់ចែងរៀបចំកម្មវិធី ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណាព្រះមហាក្សត្រនៃកម្ពុជា។

គណៈកម្មការអន្តរក្រសួងនេះ មានតួនាទី និងការកិច្ច ដឹកនាំ រៀបចំ ចាត់ចែង សម្របសម្រួលជាមួយស្ថាប័ន និងអង្គភាពពាក់ព័ន្ធ, រៀបចំគម្រោងចំណាយផ្សេងៗ, រៀបចំការពារសន្តិសុខ របៀបរៀបរយ សណ្តាប់ធ្នាប់ ចរាចរណ៍ និងធានាសុវត្ថិភាពឱ្យបានគ្រប់គ្រាន់ មុន-ក្រោយកម្មវិធី, ទំនាក់ទំនងអញ្ជើញភ្ញៀវជាន់ខ្ពស់ជាតិ អន្តរជាតិ, និងផ្សព្វផ្សាយព័ត៌មានពាក់ព័ន្ធនឹងការប្រារព្ធព្រះរាជពិធីឱ្យបានទូលំទូលាយ៕