ពីធីករម្នាក់ត្រូវបាន កោះហៅមកណែនាំ និង ឱ្យសូមទោសជាសាធារណៈ ក្រោយប្រើ ពាក្យសម្តីលេបខាយប៉ះពាល់ដល់សេចក្តីថ្លៃថ្នូរស្រ្តី

ភ្នំពេញ៖ ពិធីករកីឡាប្រដាល់ម្នាក់ ឈ្មោះ ជួប វុត្ថា នៅព្រឹកថ្ងៃទី៤ ខែមីនា ឆ្នាំ២០២៥ ត្រូវបានក្រសួងព័ត៌មានកោះហៅឱ្យចូលខ្លួនបំភ្លឺ ស្តាប់ការណែនាំ និងឱ្យសូមទោសជាសាធារណៈ ក្រោយរូបគេ ប្រើប្រាស់ពាក្យសម្តីបែបលេបខាយបៀតបៀនលើស្រ្តីដែលជាអ្នកលើកស្លាកទឹកប្រដាល់ គឺ កញ្ញា ឆឹង ច័ន្ទមុនីរស្មី។ការកោះហៅឱ្យចូលខ្លួនណែនាំនេះ គឺធ្វើឡើងក្រោយពីមហាជនរិះគន់ពេលបានឃើញវីដេអូបែកធ្លាយតាមបណ្តាញសង្គម។

ក្រោយរងការប្រតិកម្មយ៉ាងចាស់ដៃទៅលើពិធីករ ជួប វុត្ថា ក្រសួងព័ត៌មាន និង ក្រសួងកិច្ចការនារី នាថ្ងៃទី ០៤ មីនា ២០២៥ បានសម្របសម្រួលនិងដឹកនាំកិច្ចប្រជុំពិនិត្យលើក្រមសីលធម៌វិជ្ជាជីវៈ និង ការប្រើប្រាស់ពាក្យសម្តីលេបខាយបៀតបៀនលើស្ត្រីភេទរបស់ពិធីករកីឡាប្រដាល់ រូបនេះ ចំពោះ កញ្ញា ឆឹង ច័ន្ទមុនីរស្មី តាមរយៈវីដេអូដែលបានផ្សព្វផ្សាយតាមបណ្តាញសង្គមនាពេលកន្លងទៅ។

នៅចំពោះមុខអាជ្ញាធរពាក់ព័ន្ធ ពិធីករ ជួប វុត្ថា បានបង្ហាញការសោកស្តាយ និង សូមអភ័យទោសជាសាធារណៈ ចំពោះកញ្ញា ឆឹង ច័ន្ទមុនីរស្មី និង ស្ត្រីគ្រប់រូបព្រមទាំងសាធារណជន ចំពោះកំហុសឆ្គងដោយខ្វះការពិចារណាទៅកាន់ស្ត្រី ដែលធ្វើឱ្យប៉ះពាល់កិត្តិយសស្ត្រី។

ក្នុងលិខិតសូមទោសនោះ លោកបានសរសេរយ៉ាងដូច្នេះថា «ខ្ញុំបាទ ជួប វុត្ថា សូមសន្យាថាមិនឱ្យមានរូបភាព និងទង្វើបែបនេះកើតឡើងទៀតទេ សូមប្អូនស្រី និងស្រ្តី រួមទាំងមហាជនទាំងអស់អភ័យទោសដល់ខ្ញុំបាទ ជួប វុត្ថា​ ផង៕