នាយករដ្ឋមន្រ្តីថៃចាត់ទុកការបញ្ជូន«ជនជាតិអ៊ុយហ្គួរ»ទៅចិនវិញស្របតាមច្បាប់អន្តរជាតិ

បាងកក៖ នាយករដ្ឋមន្ត្រីថៃ លោកស្រី Paetongtarn Shinawatra គូសបញ្ជាក់ថាការបញ្ជូនជនជាតិអ៊ុយហ្គួរប្រមាណ៤០នាក់ទៅប្រទេសចិនវិញគឺប្រទេសថៃបានធ្វើសកម្មភាពស្របតាមសិទ្ធិមនុស្ស និងតាមច្បាប់អន្តរជាតិ។ ការថ្លែងរបស់លោកស្រីនេះធ្វើឡើងប៉ុន្មានថ្ងៃតែប៉ុណ្ណោះបន្ទាប់ពីសហរដ្ឋអាម៉េរិក បានប្រកាសថ្កោលទោសប្រទេសថៃ ក្នុងការសម្រេចចិត្តបញ្ជូនជនជាតិភាគតិចអ៊ុយហ្គួរប្រមាណ៤០នាក់ ត្រឡប់ទៅប្រទេសចិនវិញ ដោយការបញ្ចូនពួកគេទៅប្រទេសចិនវិញនេះនឹងបណ្តាលឲ្យពួកគេប្រឈមទៅនឹងការកាត់ទោស និងធ្វើទារុណកម្មផ្សេងៗ។

តាមលោកស្រី Paetongtarn Shinawatra យើងពិតជាបានធ្វើអ្វីគ្រប់យ៉ាងត្រឹមត្រូវលើសិទ្ធិមនុស្ស និងតាមច្បាប់អន្តរជាតិក្នុងការបញ្ជូនជនជាតិអ៊ុយហ្គួរទាំងនោះត្រឡប់ទៅប្រទេសចិន លោកស្រីបានបញ្ជាក់ទៀតថាការសម្រេចចិត្តបញ្ជូនជនជាតិ អ៊ុយហ្គួរ ត្រឡប់ទៅកាន់ប្រទេសចិនវិញធ្វើឡើងស្របតាមសំណើរបស់ចិនដែលបានធានាថា អ្នកទាំងនោះនឹងមិនប្រឈមការដាក់ពិន័យ ឬការធ្វើបាបទារុណកម្មឡើយ។

អាម៉េរិកបានចាត់ទុកទង្វើរបស់ថៃនេះផ្ទុយទៅនឹងប្រពៃណីដ៏យូរអង្វែងរបស់ប្រជាជនថៃ ក្នុងការការពារជនងាយរងគ្រោះបំផុត និងមិនស្របនឹងការប្តេជ្ញាចិត្តរបស់ប្រទេសថៃក្នុងការការពារសិទ្ធិមនុស្ស។ យើងជំរុញឱ្យរដ្ឋាភិបាលទាំងអស់ក្នុងប្រទេសនាៗរួមទាំងថៃដែលកំពុងតែមានវត្តមានជនជាតិអ៊ុយហ្គួរ ស្វែងរកការការពារកុំបង្ខំឱ្យជនជាតិ អ៊ុយហ្គួរ ត្រឡប់ទៅប្រទេសចិនវិញ។

គួរបញ្ជាក់ថា ប្រទេសថៃ បានសម្រេចចិត្តបញ្ជូនបុរសជនជាតិអ៊ុយហ្គួរយ៉ាងហោចណាស់ ៤០នាក់ ដែលត្រូវបានឃុំខ្លួនក្នុងប្រទេសថៃអស់រយៈពេលជាងមួយទសវត្សរ៍ បង្ខំឲ្យនិរទេសទៅកាន់ប្រទេសចិនវិញ។ ជនជាតិអ៊ុយហ្គួរបុរសទាំងនោះបានធ្វើការអំពាវនាវជាសាធារណៈកាលពីខែមុន ដើម្បីបញ្ឈប់ការនិរទេសត្រឡប់ទៅប្រទេសចិនវិញដោយលើកហេតុផលថាពួកគេអាចនឹងប្រឈមមុខនឹងការជាប់ពន្ធនាគារ និងការស្លាប់ដែលអាចកើតមាននៅក្នុងប្រទេសចិន៕