.png?1741682398)
.jpg?1740716515)
ភ្នំពេញ៖ ក្រសួងអប់រំ នាថ្ងៃទី ២៨ កុម្ភៈ បានប្រកាសនូវសេចក្តីជូនដំណឹងពាក់ព័ន្ធនឹង ការបន្តដំណើរការ «កម្មវិធីសាលារៀនជំនាន់ថ្មី» តែនឹងលុបចោលកម្មវិធីសិក្សាទំនើប ក្រោយមានការភាន់ច្រលំពាក់ព័ន្ធនឹងសាលារៀនជំនាន់ថ្មី និង កម្មវិធីសិក្សាទំនើប។
បើតាមក្រសួងអប់រំ បានឱ្យដឹងថា ក្នុងពេលថ្មីៗ សាធារណជនជាច្រើនមានការយល់ច្រឡំថា ក្រសួងនឹងលុបចោលកម្មវិធីសាលារៀនជំនាន់ថ្មី។ អាស្រ័យហេតុនេះ ក្រសួងបានចេញសេចក្តីជូនដំណឹងជាសាធារណៈថា ក្រសួងនឹងនៅតែបន្តអនុវត្តកម្មវិធីសាលារៀនជំនាន់ថ្មីនេះតទៅទៀត តែនឹងលុបចោលកម្មវិធីសិក្សាទំនើប។
ជាពិសេស ក្រសួងអប់រំនឹងបន្តវិនិយោគបន្ថែមទៀតទៅលើ សាលារៀនជំនាន់ថ្មី ដើម្បីឱ្យដំណើរការ ចំនួន ១៤ កន្លែង នៅទូទាំងប្រទេសក្នុងឆ្នាំសិក្សា ២០២៤-២០២៥ នេះ។
ភាពខុសគ្នារវាង សាលារៀនជំនាន់ថ្មី និងកម្មវិធីសិក្សាទំនើប ខុសគ្នាត្រង់ថា កម្មវិធីសាលារៀនជំនាន់ថ្មី គឺជាគ្រឹះស្ថានសិក្សាសាធារណៈ ស្ថិតនៅក្រោមការគ្រប់គ្រងដោយផ្ទាល់របស់ ក្រសួងអប់រំ យុវជន និងកីឡា ដែលផ្តល់ជាគំរូអភិបាលកិច្ចល្អ ស្តង់ដាវិជ្ជាជីវៈខ្ពស់ និងផ្តល់ការអប់រំមាន គុណភាពខ្ពស់។ តែ «កម្មវិធីសិក្សាទំនើប» ជាកម្មវិធីដែលត្រូវបានអនុវត្តដោយក្រុមហ៊ុនឯកជននៅតាមសាលាបឋមសិក្សា ចំនួន ១៨ ក្នុងរូបភាពជាកិច្ចសហការរវាងផ្នែកឯកជនជាមួយនឹងសាលារៀនផ្ទាល់ និងមិនស្ថិតក្រោមការ គ្រប់គ្រងរបស់ក្រសួង។
ដោយផ្អែកលើបទពិសោធន៍ជោគជ័យប្រកបដោយផ្លែផ្កា ក្រសួងនឹងអនុវត្តគោលការណ៍ ដូចខាងក្រោម សម្រាប់ការបន្តអភិវឌ្ឍសាលារៀនជំនាន់ថ្មី៖
១. សាលារៀនជំនាន់ថ្មី ដែលមានស្រាប់នឹងបន្តដំណើរ ដោយរាជរដ្ឋាភិបាលផ្តល់ថវិកាបន្ថែម ដើម្បី ជំនួសការបង់វិភាគទានជាកាតព្វកិច្ចរបស់មាតាបិតា ដើម្បីធានាការអប់រំប្រកបដោយសមធម៌។ សាលារៀននៅតែអាចបន្តទទួលវិភាគទានពីសប្បុរសជន និងមាតាបិតា តាមគោលការណ៍ស្ម័គ្រចិត្ត។
២. ក្រសួងនឹងពង្រីកកម្មវិធីសាលារៀនជំនាន់ថ្មីបន្ថែមទៀតតាមលទ្ធភាពថវិកា ដើម្បីផ្តល់ឱកាសដល់ សិស្សក្នុងការទទួលការអប់រំប្រកបដោយគុណភាពខ្ពស់ សមធម៌ និងគ្មានការរើសអើង។
ជាមួយគ្នានេះ ក្រសួងអប់រំ យុវជន និងកីឡានឹងលុបចោលនូវការអនុវត្ត «កម្មវិធីសិក្សាទំនើប» ដែល បានអនុវត្តដោយក្រុមហ៊ុនឯកជននៅតាមសាលាបឋមសិក្សា ចំនួន ១៨ មានសិស្ស ចំនួន ៤ ៣០០ នាក់ កំពុង សិក្សារៀនសូត្រ ក្នុងរូបភាពជាកិច្ចសហការរវាងផ្នែកឯកជនជាមួយនឹងសាលារៀនផ្ទាល់ និងមិនស្ថិតក្រោមការ គ្រប់គ្រងរបស់ក្រសួង។ ក្រសួងនឹងលុបចោលការអនុវត្ត «កម្មវិធីសិក្សាទំនើប» ដោយក្រោមមូលហេតុថា កម្មវិធីនេះអនុវត្តខុសពីនីតិវិធីនៃការគ្រប់គ្រងទ្រព្យសម្បត្តិរដ្ឋ ព្រមទាំងបង្កើតឱ្យមានការ រើសអើងរវាងសិស្ស ដែលកំពុងសិក្សាក្នុងថ្នាក់តែមួយ ដែលមានលទ្ធភាពបង់ប្រាក់ និងសិស្សដែលគ្មានលទ្ធភាព បង់ប្រាក់ ព្រមទាំងបង្កើតឱ្យមានស្តង់ដាពីរក្នុងសាលារៀនតែមួយ។
គួរបញ្ជាក់ផងដែរថា សាលារៀនជំនាន់ថ្មីផ្តោតលើការអនុវត្តកម្មវិធីសិក្សាពេញលេញ ផ្តល់ឱកាសសិក្សាពេញមួយថ្ងៃ អនុវត្តវិធីសាស្ត្របង្រៀនទំនើបតាមបែបរិះរក ការដោះស្រាយបញ្ហា និងការសិក្សាតាមបែបគម្រោង កម្មវិធីបច្ចេកវិទ្យា ដែលបណ្តុះទាំងវិជ្ជាសម្បទា បំណិនសតវត្សទី២១ ជាពិសេសបំណិនសហការ ត្រិះរិះពិចារណា ទំនាក់ទំនង លើកកម្ពស់ស្វ័យសិក្សា ការស្រាវជ្រាវរបស់សិស្ស និងការរៀបចំពិព័រណ៌ស្នាដៃសិស្ស រួមទាំងការអប់រំសីលធម៌ និងចរិយាធម៌ ដែលឆ្លើយតបទៅនឹងយុគសម័យបច្ចេកវិទ្យាឌីជីថល។ សាលារៀនជំនាន់ថ្មីបានបំពាក់សម្ភារៈ និងបរិក្ខាររៀន និងបង្រៀនទំនើប និងរៀបចំបណ្ណាល័យសតវត្ស ទី២១ អាហារដ្ឋាន បន្ទប់ពិសោធន៍ ដែលអាចឱ្យគ្រូបង្រៀន និងសិស្សប្រើប្រាស់បច្ចេកវិទ្យា និងភាសាបរទេស៕
.jpg?1743583939)
