បាងកក៖ មានយ៉ាងហើចណាស់មនុស្សប្រមាណ ១៨នាក់បានស្លាប់ និង ៣១នាក់ផ្សេងទៀតរងរបួសធ្ងន់ស្រាលក្នុងហេតុការណ៍ក្រឡាប់ឡានក្រុងដឹកអ្នកដំណើរមួយកើតឡើងនៅយប់ថ្ងៃពុធ។តាមប្រព័ន្ធផ្សព្វផ្សាយថៃឧបទ្ទវហេតុនេះបានកើតឡើងនៅក្នុងខេត្ត Prachinburi ក្នុងអំឡុងពេលរថយន្តធ្វើដំណើរនាពេលយប់ពីភាគខាងជើងប្រទេសថៃទៅកាន់ខេត្ត Rayong សម្រាប់ដំណើរទេសចរណ៍ក្នុងក្រុង។
តាមអាជ្ញាធរថៃបានអះអាងថាបច្ចុប្បន្នប៉ូលីសជំនាញកំពុងសម្របសម្រួលជាមួយប៉ូលីសតំបន់ក្នុងការស៊ើបអង្កេតគ្រោះថ្នាក់ចរាចរណ៍ដ៏រន្ធត់មួយនេះ ហើយនឹងពង្រឹងការត្រួតពិនិត្យយានយន្តដឹកជញ្ជូនសាធារណៈទាំងអស់ ដើម្បីធានាថាពួកគេបំពេញតាមស្តង់ដារសុវត្ថិភាព។
សុវត្ថិភាពផ្លូវគឺជាបញ្ហាចម្បងនៅក្នុងប្រទេសថៃ ដែលយោងទៅតាមអង្គការសុខភាពពិភពលោកប្រទេសថៃជាប់ចំណាត់ថ្នាក់ទី ៩ ក្នុងចំណោមប្រទេសសមាជិក ១៧៥ ចួបបញ្ហាគ្រោះថ្នាក់ចរាចរណ៍ជាញឹកញាប់។
ឧប្បត្តិហេតុស្រដៀងគ្នានេះដែរកាលពីខែតុលាឆ្នាំមុនមានសិស្ស និងគ្រូបង្រៀនសរុបចំនួន ២៣ នាក់បានស្លាប់នៅក្នុងភ្លើងឆេះរថយន្តក្រុងដ៏គួរឱ្យរន្ធត់មួយខណៈពេលកំពុងធ្វើដំណើរទៅសាលារៀន ការឆាបឆេះនោះផ្តើមចេញពីសំបកកង់រថយន្តមួយផ្ទុះ ហើយរថយន្តបានខ្ទាតទៅប៉ះរបាំងផ្លូវហើយបណ្តាលឲ្យឆាបឆេះពេញរថយន្តដោយសារតែរថយន្តជាប្រភេទប្រើហ្គាស់៕
