ថៃប្តេជ្ញាចាប់ដៃជាមួយប្រទេសក្បែរខាងដើម្បីបង្ក្រាប«ឧក្រិដ្ឋកម្មបោកប្រាស់»តាមអនឡាញ

ថៃ៖ នាយករដ្ឋមន្ត្រីថៃ លោកស្រី ភែថងថាន បានប្រកាសពីការប្តេជ្ញាចិត្តរបស់ខ្លួនក្នុងនាមជាមេដឹកនាំថៃ ដើម្បីចាប់ដៃគ្នាសហការជាមួយប្រទេសក្បែរខាង បង្ក្រាបបញ្ហាឧក្រិដ្ឋកម្មក្លែងបន្លំទូរគមនាគមន៍ ឬហៅថា «ឧក្រិដ្ឋកម្មបោកប្រាស់»តាមអនឡាញប្រកបដោយមានប្រសិទ្ធភាព។

ថ្លែងក្នុងសន្និសីទសារព័ត៌មាន ក្រោយបញ្ចប់កិច្ចប្រជុំនៅគណៈរដ្ឋមន្ត្រី​ កាលពីថ្ងៃទី ២៥ កុម្ភៈ លោកស្រី ភែថងថាន បានថ្លែងអួតពីការយកចិត្តទុកដាក់របស់រាជរដ្ឋាភិបាលថៃ ចំពោះបញ្ហា«ឧក្រិដ្ឋកម្មបោកប្រាស់»តាមអនឡាញ ហើយបានលើកឡើងពីសមិទ្ធផលដែលអាជ្ញាធរថៃបង្ក្រាបបានជាបន្តបន្ទាប់ ក្នុងការប្រយុទ្ធប្រឆាំងនឹងឧក្រិដ្ឋកម្មបែបនេះ និងធ្វើមាតុភូមិនិវត្តន៍ជនសង្ស័យ។

បើតាមលោកស្រី ភែថងថាន ប្រទេសថៃនឹងបន្តពង្រឹងកិច្ចសហប្រតិបត្តិការ និងកិច្ចសន្ទនាជាមួយ ប្រទេសចិន និង មីយ៉ាន់ម៉ា ដើម្បីលុបបំបាត់ឧក្រិដ្ឋកម្មក្លែងបន្លំទូរគមនាគមន៍ ដោយបន្ថែមថា នាយកដ្ឋានរដ្ឋាភិបាលថៃជាច្រើនកំពុងសហការជាមួយក្រុមហ៊ុនទូរគមនាគមន៍ ដើម្បីកាត់ផ្តាច់ទំនាក់ទំនងគួរឱ្យសង្ស័យ និង បណ្តាញបណ្តាញនៅក្នុងតំបន់ព្រំដែន។

លោកស្រីបានថ្លែងយ៉ាងដូច្នេះថា "ខ្ញុំចង់បញ្ជាក់ម្តងទៀតថា [ឧក្រិដ្ឋកម្មក្លែងបន្លំតាមទូរគមនាគមន៍] មិនទាន់ចប់នៅឡើយទេ ហើយយើងត្រូវតែយកបញ្ហានេះឱ្យបានហ្មត់ចត់។ ឥឡូវនេះ មិនថាទាក់ទងនឹងកិច្ចសហប្រតិបត្តិការ ឬការដោះស្រាយបញ្ហា យើងបានទទួលមតិកែលម្អពីប្រទេសជាច្រើន"។

ពាក់ព័ន្ធជាមួយរាជរដ្ឋាភិបាលកម្ពុជា លោកស្រី ភែថងថាន បានប្រកាសរៀបចំដំណើរទស្សនកិច្ចទៅកាន់ ខេត្តស្រះកែវ ជាប់ព្រំដែនកម្ពុជា នៅថ្ងៃសុក្រនេះ ដើម្បីវាយតម្លៃស្ថានភាព និង ពង្រឹងកិច្ចសហប្រតិបត្តិការជាមួយរដ្ឋាភិបាលកម្ពុជា ជំរុញប្រតិបត្តិការរួមគ្នាប្រឆាំងនឹងអ្នកបោកប្រាស់៕