កណ្តាល៖ គិតត្រឹមថ្ងៃទី ២១ កុម្ភៈនេះ អាកាសយានដ្ឋានអន្តរជាតិតេជោ ដំណាក់កាលទី១ សម្រេចការសាងសង់បានប្រមាណជាង ៩៤%ហើយ ដោយគ្រោងដាក់ឲ្យដំណើរការជាផ្លូវការ នៅអំឡុងខែកក្កដាខាងមុខនេះ។ការងារដែលនៅសេសសល់ គឺជាការងារបច្ចេកទេសទាមទារចំណាយពេលត្រួតពិនិត្យឱ្យបានល្អ។នេះបើតាមការអះអាងរបស់លោកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC)។
លោកឧកញ៉ា ឆារស៍ វ៉ាន់ ការពីថ្ងៃទី ២១ កុម្ភៈម្សិលមិញបានដឹកនាំស្ថានទូតចំនួន២ប្រចាំនៅកម្ពុជា រួមមាន អូស្រ្តាលី និងហ្វីលីពីន ដើម្បីពិនិត្យវឌ្ឍនភាពនៃដំណើរការសាងសង់ព្រលាយន្តហោះអន្តរជាតិតេជោ។សម្រាប់ទូតអូស្រ្តាលី គឺក្នុងគោលបំណងជំរុញការហោះហើរ និង ទាក់ទាញភ្ញៀវទេសចរ ហើយហ្វីលីពីន គឺសិក្សាស្វែងយល់បន្ថែមពីការងារត្រៀមបើកសាលាបង្រៀនជួសជុលយន្តហោះនៅកម្ពុជា ក្នុងសាកលវិទ្យាល័យខេមតិច។
ថ្លែងប្រាប់អ្នកសារព័ត៌មានក្រោយបញ្ចប់ដំណើរទស្សនកិច្ច លោកឧកញ៉ា ឆារស៍ វ៉ាន់ បានគូសបញ្ជាក់ថា ការងារសាងសង់ អាកាសយានដ្ឋានអន្តរជាតិតេជោ ដំណាក់កាលទី១ សម្រេចការសាងសង់បានប្រមាណជាង ៩៤% ហើយការងារសេសសល់ គឺជាការងារបច្ចេកទេសច្រើន ប៉ុន្តែយ៉ាងណាក្រុមការងារសាងសង់នឹងខិតខំប្រឹងប្រែងឱ្យទាន់ពេលវេលា ដោយគ្រោងដាក់ឲ្យដំណើរការជាផ្លូវការ ដំណាក់កាលទី១នៅអំឡុងខែកក្កដាខាងមុខនេះ។
បើតាមលោកឧកញ៉ា ឆារស៍ វ៉ាន់ អាកាសយានដ្ឋានអន្តរជាតិតេជោ គឺជាព្រលានដ៏ធំដំបូងរបស់កម្ពុជា ដោយបានសាងសង់ឡើងបង្កប់ដោយរចនាបថបែបខ្មែរ ហើយក្នុងព្រលានទាំងមូលមានរៀបចំដាំដើមឈើប្រណិតរបស់ខ្មែរអមជាមួយសាងសង់ផ្ទះខ្មែរបុរាណ ដើម្បីបង្ហាញភ្ញៀវទេសចរពេលឆ្លងកាត់មកប្រទេសកម្ពុជា។ក្រៅពីនេះ អាកាសយានដ្ឋានអន្តរជាតិតេជោ មានរៀបចំតំបន់សេដ្ឋកិច្ច ពាណិជ្ជកម្ម វិនិយោគជាច្រើន ជាផ្នែកសំខាន់សម្រាប់ជួយសេដ្ឋកិច្ច។
សូមជម្រាបថា អាកាសយានដ្ឋានអន្តរជាតិតេជោ ដែលស្ថិតនៅក្រុងតាខ្មៅ ខេត្តកណ្តាល គិតមកដល់ពេលនេះ ដំណាក់កាលទី១ សម្រេចការសាងសង់បានប្រមាណ ៩៤%ហើយ ដោយគ្រោងដាក់ឲ្យដំណើរការជាផ្លូវការ នៅអំឡុងខែកក្កដាខាងមុខនេះ។
អាកាសយានដ្ឋានថ្មីនេះ សាងសង់ឡើងលើផ្ទៃដីជាង ២.៦០០ហិចតា ជាព្រលានយន្តហោះលំដាប់ F4 ដែលអាចឱ្យយន្តហោះធន់ធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១នេះ៕
.jpg?1739962010)
