ប៉េកាំង៖ បច្ចេកវិជ្ជាទំនើបៗដោយរួមបញ្ចូលបញ្ញាសិប្បនិម្មិត (AI) បានបង្កើតនូវការសម្តែងរាំដ៏លេចធ្លោមួយដោយមានមនុស្សយន្ត ចាប់ដៃគ្នាជាមួយមនុស្ស សម្តែងនៅលើឆាកនៃពិធីអបអរសាទរបុណ្យចូលឆ្នាំថ្មីប្រពៃណីចិន ក្នុងទូរដ្ឋធានីប៉េកាំងរបស់ប្រទេសចិន។ការសម្តែងរួមគ្នានេះ ទាញការចាប់អារម្មណ៍ជាខ្លាំងសម្រាប់សាធារណជនដែលបានចូលរួមទស្សនា។
ក្នុងឱកាសនៃពិធីអបអរសាទរបុណ្យចូលឆ្នាំថ្មីប្រពៃណីចិនឆ្នាំ២០២៥ ក្នុងរដ្ឋធានីប៉េកាំង ក្រុមអ្នកសម្តែងមួយក្រុម បានជួបជុំគ្នាហាត់សម និង បានឡើងលើឆាកសម្តែងជូនអ្នកទស្សនា ហើយការសម្តែងនោះ គឺមានការសហការគ្នារវាងមនុស្សយន្ត និង មនុស្សធម្មតាដែលធ្វើអោយទស្សនិកជនភ្ញាក់ផ្អើលយ៉ាងខ្លាំង។
មនុស្សយន្តដោយភ្ជាប់នូវបច្ចេកវិជ្ជាទំនើបៗដោយរួមបញ្ចូលបញ្ញាសិប្បនិម្មិត (AI)បានអនុវត្តតាមក្បាច់ក្បួននៃចង្វាក់រាំ តាមការកំណត់របស់អ្នកដឹកនាំបានយ៉ាងល្អ ដើម្បីបង្ហាញពីការបញ្ចូលគ្នានៃប្រពៃណី និង ការច្នៃប្រឌិត។កម្មវិធី AI ចាប់យករាល់ចលនារបស់អ្នករាំ បំប្លែងពួកវាទៅជាការណែនាំដែលសម្រួលដោយវិស្វករ ហើយនេះ វាជាលើកទីពីរហើយសម្រាប់ក្រុមមនុស្សយន្ត ដើម្បីបង្ហាញខ្លួននៅលើឆាកធំនៃពិធីបុណ្យចូលឆ្នាំចិនឆ្នាំ២០២៥នេះ។
គួរបញ្ជាក់ថា នៅឆ្នាំ២០២១ ក៏មានមនុស្សយន្តរាំសម្តែងដូចគ្នាដែរ តែជាការសម្តែងដោយមនុស្សយន្តមានជើង៤ ហើយនៅឆ្នាំ២០២៥នេះ ក្រុមអ្នកជំនាញចិនបានព្យាយាមអភិវឌ្ឍ ដល់មនុស្សយន្តដែលមានជើងពីរនៅឆ្នាំនេះ ដែលបង្ហាញពីការជឿនលឿនផ្នែកបច្ចេកវិទ្យាបានជំរុញលទ្ធភាពច្នៃប្រឌិតក្នុងស្រុកចិន៕
