អាម៉េរិក៖ ភ្លើងឆេះព្រៃនៅក្រុងឡូសអេនជឺលេស នៃរដ្ឋ កាលីហ្វ័រញ៉ាចាប់តាំងពីយប់ថ្ងៃអង្គារទី ៧មករាមកដល់ថ្ងៃច័ន្ទទី ១៣ មករា នេះភ្លើងឆេះសន្ធោសន្ធៅមិនធ្លាប់មាននេះបានបំផ្លាញផ្ទៃដីព្រៃឈើដល់ជាង ២ម៉ឺនហិកតា និងបណ្តាលឲ្យផ្ទះរាប់ម៉ឺនខ្នងរងការខូចខាតស្ទើរតែទាំងស្រុង ដោយក្នុងតំបន់ឆាបឆេះនោះមានផ្ទះតារាហូលីវូដល្បីៗជាច្រើននាក់រងការបំផ្លិចបំផ្លាញដូចគ្នា គិតត្រឹមថ្ងៃច័ន្ទនេះមានមនុស្សប្រមាណ ២៤នាក់បានស្លាប់បាត់បង់ជីវិត និងរាប់សែននាក់ត្រូវបង្ខំចិត្តជម្លៀសចេញពីតំបន់ដែលភ្លើងបានឆាបឆេះ។
យោងតាមប្រព័ន្ធផ្សព្វផ្សាយអាម៉េរិកភ្លើងឆេះព្រៃមិនធ្លាប់មានដែលបានឆាបឆេះតំបន់ទាំង៧របស់សហរដ្ឋអាម៉េរិករួមមានLidia, Olivas, Hurstm, Eaton, Woodley, Sunset និង Palisades បានបង្កឲ្យផ្ទះពលរដ្ឋអាម៉េរិករាប់ម៉ឺនខ្នងរងការបំផ្លិចបំផ្លាញ ហេដ្ឋរចនាសម្ព័ន្ធរួមមានឡានត្រូវបានភ្លើងលេបត្របាក់នៅសល់តែគ្រោងឆ្អឹង។ ភ្លើងឆេះសន្ធោសន្ធៅពន្លត់មិនបាននេះបានបំផ្លាញផ្ទៃដីជិត ២៤,០០០ ហិកតា ក្នុងនោះមានមនុស្សរាប់សែននាក់ត្រូវបានជម្លៀស។
តាមសេចក្តីប្រកាសរបស់អាជ្ញាធរក្នុងតំបន់ភ្លើងបានឆាបឆេះរហូតដល់ផ្ទៃដីជាង ២ម៉ឺនហិកតា ប៉ូលីសមិនអាចធ្វើការពន្លត់បានដោយសារកម្លាំងភ្លើងឆេះខ្លាំង លឿន និងខ្យល់បានបោកបក់កម្លាំងអគ្គិឲ្យបន្តឆាបឆេះតំបន់ក្បែរនោះលឿនជាខ្លាំង។
អ្នកពន្លត់អគ្គិភ័យ និងមន្រ្តីសង្រ្គោះបន្ទាន់ជាច្រើននាក់កំពុងតែបន្តមានវត្តមាននៅទីតាំងដែលកំពុងតែឆាបឆេះ ទោះបីជាមានការពន្លត់ភ្លើងពីមនុស្សរាប់ពាន់នាក់ក្តីក៏ភ្លើងនៅតែបន្តឆាបឆេះតំបន់មួយចំនួនទៀត។ គេប៉ានប្រមាណថាទំហំខូចខាតដោយសារភ្លើងឆេះនេះអាចនឹងដល់រាប់ពាន់លានដុល្លារសហរដ្ឋអាម៉េរិក៕
