ឥណ្ឌា៖ បុរសជនជាតិកាណាដាវ័យ ៣២ ឆ្នាំម្នាក់ ត្រូវបានឥណ្ឌាចាប់ខ្លួននៅអាកាសយានដ្ឋានដេលី កាលពីថ្ងៃចន្ទពីបទដឹកជញ្ជូនលលាដ៍ក្បាលក្រពើដាក់ចូលក្នុងវ៉ាលីរបស់រូបគេ លលាដ៍ក្បាលក្រពើនេះរូបគេបានអះអាងថាបានទិញនៅប្រទេសថៃ។
យោងតាមសេចក្តីប្រកាសរបស់អាជ្ញាធរឥណ្ឌា លលាដ៍ក្បាលក្រពើដែលមានធ្មេញមុតស្រួច ត្រូវបានរកឃើញក្នុងអំឡុងពេលត្រួតពិនិត្យសន្តិសុខក្នុងព្រលានយន្តហោះដេលី ឆែករកឃើញមុនពេលរូបគេតជើងហោះហើរឡើងយន្តហោះបន្តទៅប្រទេសកាណាដាវិញ។
អាជ្ញាធរឥណ្ឌា បានបន្តទៀតថាបុរសនោះ បានបំពានច្បាប់ការពារសត្វព្រៃ និងច្បាប់គយ ដោយកាន់កាប់លលាដ៍ក្បាលដោយគ្មានការអនុញ្ញាត។ បច្ចុប្បន្ននេះលលាដ៍ក្បាលក្រពើនេះ ត្រូវបានប្រគល់ទៅឱ្យនាយកដ្ឋានព្រៃឈើ និងសត្វព្រៃរបស់ប្រទេសឥណ្ឌា ហើយរូបបុរសខាងលើត្រូវបានធ្វើការឃាត់ខ្លួនជាបណ្តោះអាសន្ន៕
