តារាសម្តែងចិនបាត់ខ្លួននៅថៃរកឃើញក្នុងភូមាកំពុងបញ្ជូនមកថៃវិញ

ថៃ៖ តារាសម្តែងល្បីជនជាតិចិនម្នាក់ដែលមានឈ្មោះថា Wang Xing បានបាត់ខ្លួននៅក្នុងប្រទេសថៃ ត្រូវបានរកឃើញក្នុងប្រទេសភូមា ហើយបច្ចុប្បន្នអាជ្ញាធរថៃកំពុងសម្រួលបញ្ជូនមកទឹកដីថៃវិញ។នេះបើយោងតាមប្រសាសន៍របស់លោកស្រី Paetongtarn Shinawatra នាយករដ្ឋមន្ត្រីថៃ។

 តារាសម្តែងជនជាតិចិន Wang Xing បានធ្វើដំណើរពីទីក្រុងសៀងហៃប្រទេសចិន ទៅប្រទេសថៃ ដើម្បីសម្តែងថតកុននៅទីនោះ។ពេលធ្វើដំណើរដល់ព្រលានយន្តហោះសុវណ្ណភូមិឡើងជិះយន្តហោះក៏វង្វេងផ្លូវដល់ព្រំដែនថៃ និងមីយ៉ាន់ម៉ា ហើយបានបាត់ខ្លួន។

តាមការចុះផ្សាយរបស់បណ្តាញសារព័ត៌មានថៃ The Nation បានរាយការណ៍ថា នាយករដ្ឋមន្ត្រី Paetongtarn Shinawatra បានបញ្ជាក់ថា តារាសម្តែងចិន Xingxing បានបាត់ខ្លួនពាក់ព័ន្ធនឹងការឆបោកតាមមជ្ឈមណ្ឌល ហៅទូរស័ព្ទរបស់មីយ៉ាន់ម៉ា ត្រូវបានរកឃើញ ហើយកំពុងរង់ចាំការផ្ទេរត្រឡប់ទៅអាជ្ញាធរថៃវិញ។

ថ្លែងទៅកាន់អ្នកសារព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍ លោកស្រីនាយករដ្ឋមន្ត្រី បាននិយាយថា ក្រសួងការបរទេសថៃ បានធ្វើការទំនាក់ទំនងជាប្រចាំជាមួយរដ្ឋាភិបាលចិន ដើម្បីដោះស្រាយបញ្ហានេះ។ រដ្ឋាភិបាល​ថៃ​បាន​ប្រគល់​ភារកិច្ច​ឲ្យ​រដ្ឋមន្ត្រី​ការ​បរទេស​សហការ​ជាមួយ​ប្រទេស​ផ្សេង​ទៀត​លើ​បញ្ហា​ទាំង​នេះ និង បានធានាថា ការបាត់ខ្លួនរបស់តារាប្រុសរូបនេះ នឹងមិនប៉ះពាល់ដល់ឧស្សាហកម្មទេសចរណ៍របស់ប្រទេសថៃឡើយ។

ក្រៅពីនេះនាយករដ្ឋមន្ត្រី បានពិភាក្សាអំពីគោលនយោបាយសន្តិសុខតាមអ៊ីនធឺណិតជាមួយមេដឹកនាំពិភពលោក ដើម្បីទប់ស្កាត់ឧក្រិដ្ឋកម្មដូចនេះ និង ដោះស្រាយការផ្សព្វផ្សាយព័ត៌មានក្លែងក្លាយនៅពេលមានឧបទ្ទវហេតុបែបនេះកើតឡើង៕