កូនស្រីថាក់ស៊ីនមាន«ទ្រព្យសម្បត្តិ»ជាង៤០០លានដុល្លារ

ថៃ៖ នាយករដ្ឋមន្រ្តីថៃលោកស្រី Paetongtarn Shinawatra នៅថ្ងៃទី ៣ មករានេះបានប្រកាសទ្រព្យសម្បត្តិរបស់ខ្លួនដែលលោកស្រីមានជាង ៤០០ លានដុល្លារដែលក្នុងនោះរួមមានកាបូបទំនើបៗ ២០០ ដែលមានតម្លៃជាង ២ លានដុល្លារ និងនាឡិកាប្រណីតយ៉ាងហោចណាស់ ៧៥ គ្រឿង ដែលមានតម្លៃជិត ៥ លានដុល្លារ ក្រៅពីនោះលោកស្រីមានជំនួញ និងទ្រព្យជាច្រើនទៀតនៅក្នុងស្រុក និងខាងក្រៅស្រុក។

យោងតាមការចេញផ្សាយដោយកាសែតសិង្ហបុរី CNAបានឲ្យដឹងថាកូនស្រីពៅរបស់មហាសេដ្ឋី និងជាអតីតនាយករដ្ឋមន្ត្រីថៃថាក់ស៊ីន ស៊ីណាវ៉ាត្រាលោកស្រី Paetongtarn បានចូលកាន់តំណែងកាលពីខែកញ្ញា ក្នុងនាមជាសមាជិកទីបួននៃត្រកូលដែលដឹកនាំរដ្ឋាភិបាលថៃក្នុងរយៈពេល ២០ ឆ្នាំ។លោកស្រីមានកាតព្វកិច្ចប្រកាសទ្រព្យសម្បត្តិ និងបំណុលរបស់ខ្លួនទៅគណៈកម្មាធិការជាតិប្រឆាំងអំពើពុករលួយ (NACC)របស់ថៃ ដោយទ្រព្យសម្បត្តិដែលលោកស្រីបានប្រកាសនោះមានដល់ទៅ ១៣,៨ ពាន់លានបាត (៤០០ លានដុល្លារ)។

ក្នុងនោះរាប់បញ្ជូលទាំងការវិនិយោគរបស់លោកស្រីមានតម្លៃ ១១ ពាន់លានបាត ហើយលោកស្រីមានប្រាក់បញ្ញើ និងសាច់ប្រាក់មួយពាន់លានបាត។ ទ្រព្យសម្បត្តិផ្សេងទៀតរបស់លោកស្រីរួមមាននាឡិកាចំនួន ៧៥ គ្រឿងដែលមានតម្លៃ ១៦២ លានបាត កាបូបចំនួន ២១៧ម៉ូត ដែលមានតម្លៃ ៧៦លានបាត ព្រមទាំងទ្រព្យសម្បត្តិនៅទីក្រុងឡុងដ៍ និងប្រទេសជប៉ុនជាច្រើនទៀត។