.png?1741682398)
ខេត្តព្រះវិហារ៖ ស្ត្រីម្នាក់រួមទាំងទារកអាយុ៧ខែ ត្រូវបានក្រុមគ្រូពេទ្យជំនាញ បានជួយសង្គ្រោះទាន់ពេលវេលា ក្រោយពីស្ត្រីរូបនេះ បានឈឺពោះសម្រាលកូននៅផ្ទះដោយមិនដឹងខ្លួន ហើយផ្ទៃពោះទើបតែបាន ២៨សប្ដាហ៏ (ស្មើនឹង៧ខែ)។អ្នកនាំពាក្យក្រសួងសុខាភិបាលកម្ពុជា បានចាត់ទុកករណីនេះ ជាការសង្គ្រោះទារកលើកទី១ ប្រចាំឆ្នាំ២០២៥នេះ។
ស្រ្តីជាម្តាយមានឈ្មោះ ចេន អាន អាយុ១៨ឆ្នាំ រស់នៅក្នុងភូមិម្រេច (ហៅម្រេចថ្មី) ឃុំស្រយ៉ង់ ស្រុកគូលែន ខេត្តព្រះវិហារ បានឈឺពោះសម្រាលកូននៅផ្ទះរបស់គាត់ក្នុងភូមិម្រេច គឺជាផ្ទៃពោះកូនដំបូង ប៉ុន្តែផ្ទៃពោះទើបតែបាន ២៨សប្ដាហ៏ (ស្មើនឹង៧ខែ)។ការសម្រាលនេះ គឺនាងជាម្តាយមិនដឹងថាឈឺពោះសម្រាលកូនទេ ពេលទៅបត់ជើងតូចក៏សម្រាលភ្លាម ពេលនោះបងប្អូនឪពុកម្តាយ ក៏ហៅគោយន្ត និងរាយការណ៍ទៅក្រុមទ្រទ្រង់សុខភាពភូមិ។
ក្នុងអំឡុងពេលក្រុមគ្រួសារបញ្ជូនមកមណ្ឌលសុខភាពតាមគោយន្ត។ ក្រុមរថយន្តគិលានសង្រ្គោះ និង ឆ្មបរបស់មណ្ឌលសុខភាពកោះកេរ្តិ បានជួបនឹងគោយន្ដដែលដឹកស្រ្តីនោះតាមផ្លូវ ឆ្មបក៏បានសង្គ្រោះទារកដែលទើបកើតដែលមានទំងន់តែ ១គីឡូក្រាមតែប៉ុណ្ណោះ ដោយរុំនឹងក្រណាត់ក្រាស់ៗ ដើម្បីឲ្យទទួលបាននូវភាពកក់ក្ដៅ និង បានធ្វើការទំលាក់សុក (placenta)។បន្ទាប់មកក្រុមគ្រូពេទ្យ បានបញ្ជូនស្រ្តីជាម្ដាយ និងទារក ទៅកាន់មណ្ឌលសុខភាពកោះកេរ្តិ ដើម្បីពិនិត្យ និងសំអាតស្បូន។
ដោយទារកមានទំងន់ទាបពេក(ទំងន់ ១គីឡូក្រោម) មណ្ឌលសុខភាព នៅគៀកទៅនឹងខេត្តសៀមរាប លោកស្រីប្រធានមណ្ឌលសម្រេចចិត្តបញ្ជូនទាំងម្ដាយ និងទារក ទៅមន្ទីរពេទ្យគន្ធាបុប្ផានៅខេត្តសៀមរាប ដើម្បីបន្តការតាមដាន និងព្យាបាល ដោយរថយន្តគិលានសង្រ្គោះរបស់មណ្ឌលសុខភាព។ ទាំងម្ដាយ និងទារក ត្រូវបានបញ្ជូនដល់មន្ទីរពេទ្យគន្ធាបុប្ផា ខេត្តសៀមរាប ដោយសុវត្ថិភាព។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ចាត់ទុកថា ជាការសង្គ្រោះទារកលើកទី១ ប្រចាំឆ្នាំ២០២៥នេះ ដែលក្រុមគ្រូពេទ្យមណ្ឌលសុខភាពកោះកេរ្តិ៍ ក្នុងស្រុកគូលែន ខេត្តព្រះវិហារ បានជួយសង្គ្រោះស្ត្រីអាយុ ១៨ ឆ្នាំម្នាក់ ដែលបានសម្រាលកូនអាយុ ៧ ខែ កាលពីថ្ងៃទី២ ខែមករានេះ៕
.png?1744178821)
