អ៊ុយក្រែន៖ មានមីស៊ីលយ៉ាងហើចណាស់ជាង ៧០គ្រាប់ត្រូវបានរុស្ស៊ីបាញ់ស្រោចលើអ៊ុយក្រែនដែលបានបង្កឲ្យអាគារជាច្រើនខ្នងរងការបំផ្លិចបំផ្លាញ និងបង្កឲ្យមនុស្សរងរបួសជាច្រើននាក់នៅក្នុងថ្ងៃបុណ្យណូអែល។ ការវាយប្រហាររបស់រុស្ស៊ីចំថ្ងៃណូអែលនេះធ្វើឡើងបន្ទាប់ពីប៉ុន្មានថ្ងៃមុនអ៊ុយក្រែនបានបើកការវាយប្រហារមិនធ្លាប់មានលើទីក្រុងកាហ្សង់នៅភាគនិរតីនៃប្រទេសរុស្ស៊ី។
បើតាមមេដឹកនាំអ៊ុយក្រែនលោក Volodymyr Zelenskyy លោកបានថ្កោលទោសដល់លោកពូទីនជាខ្លាំងដែលជ្រើសរើសយកថ្ងៃបុណ្យណូអែលវាយប្រហារលើអ៊ុយក្រែន លោកបានចាត់ទុកទង្វើរបស់មេដឹកនាំរុស្ស៊ីជាទង្វើអមនុស្សធម៌។ លោក Zelenskyy បានឲ្យដឹងទៀតថាការវាយប្រហាររបស់រុស្ស៊ីបានបង្កឲ្យមានការដាច់ចរន្តអគ្គិសនី និងអាគារជាច្រើនខ្នងត្រូវបានមីស៊ីលរុស្ស៊ីផ្លោងចូលនិងរងការខូចខាតយ៉ាងខ្លាំងក្លា។
សម្រាប់លោក Zelenskyy ការវាយប្រហារមានមីស៊ីលរុស្ស៊ីជាង ៧០ គ្រាប់ និងយន្តហោះគ្មានមនុស្សបើកជាងមួយរយគ្រឿងបានកំណត់គោលដៅលើហេដ្ឋារចនាសម្ព័ន្ធថាមពលរបស់អ៊ុយក្រែន កងកម្លាំងអ៊ុយក្រែនបានបាញ់ទម្លាក់ដោយជោគជ័យនូវមីស៊ីលជាង ៥០ គ្រាប់ និងយន្តហោះគ្មានមនុស្សបើកមួយចំនួនធំរបស់រុស្ស៊ី៕
