ថៃ៖ អតីតនាយករដ្ឋមន្រ្តី លោកថាក់ស៊ីន ស៊ីណាវ៉ាត់ត្រា(Thaksin Shinawatra) បានច្រានចោលការចោទប្រកាន់របស់ប្រព័ន្ធផ្សព្វផ្សាយ និងអតីតមេដឹកនាំបាតុករលោកSondhi Limthongkul ថា MOU ដែលបានតាក់តែងក្នុងអាណត្តិរបស់លោកជានាយករដ្ឋមន្ត្រី ផ្តល់អត្ថប្រយោជន៍ដល់កម្ពុជាដោយការចំណាយរបស់ថៃ។
យោងតាមសារព័ត៌មានThe Nation បានឲ្យដឹងថា នៅក្នុងបទសម្ភាសន៍ខ្លីមួយកាលពីថ្ងៃពុធ លោកថាក់ស៊ីន បាននិយាយថាការអះអាងរបស់លោក Sondhi អតីតមេដឹកនាំសម្ព័ន្ធប្រជាជនដើម្បីប្រជាធិបតេយ្យ (PAD) ដែលថា MOUនេះបានផ្តល់អត្ថប្រយោជន៍ដល់កម្ពុជាដោយការចំណាយរបស់ថៃ គឺគ្មានមូលដ្ឋាននោះទេ។
លោក Sondhi Limthongkul ដែលជាអតីតមេដឹកនាំសម្ព័ន្ធប្រជាជនដើម្បីប្រជាធិបតេយ្យ បានទាមទាឱ្យរដ្ឋាភិបាលថៃដាក់សំណើរឱ្យតុលាការធម្មនុញ្ញថៃពិនិត្យ និងសម្រេចលុបចោល MOUឆ្នាំ២០០១ជាបន្ទាន់វិញ បន្ទាប់ពីក្រុមជាតិនិយមថៃបាននិយាយថា ការបន្តMOUនេះ នឹងធ្វើឲ្យប្រទេសថៃបាត់បង់ផលប្រយោជន៍មកឱ្យប្រទេសកម្ពុជា។ ក្រុមជាតិនិយមថៃ ក៏បានលើកឡើងថា MOUឆ្នាំ២០០១នេះ បានអនុញ្ញាតឲ្យកម្ពុជាគូសខ្សែព្រំដែនទឹកចូលក្នុងដែនសមុទ្រថៃ ហើយថៃនឹងប្រឈមមុខនឹងបាត់បង់ទឹកដីដែលរួមបញ្ជូលនឹងពាក់កណ្តាលនៃកោះ Ko Kut។
គួរបញ្ជាក់ថា MOU ដែលរៀបចំឡើងក្នុងឆ្នាំ 2001 ជាMOUការចរចាលើផ្ទៃដីត្រួតស៊ីគ្នា(OCA) ចំនួន ២៧,០០០គីឡូម៉ែត្រការ៉េ នៅក្នុងឈូងសមុទ្រថៃ។ ថៃ និងកម្ពុជាបានឈ្លោះប្រកែកគ្នាលើទឹកដីសមុទ្រ ដែលត្រូវបានគេគិតថាមានផ្ទុកប្រេង និងឧស្ម័នយ៉ាងច្រើនតាំងពីទសវត្សរ៍ឆ្នាំ 1970 មកម្ល៉េះ។ តំបន់ត្រួតស៊ីគ្នា(OCA)នេះ ត្រូវបានគេប៉ាន់ប្រមាណថាមានប្រហែល ១០ពាន់ពាន់លានហ្វីតគូប(10 trillion cubic feet)នៃឧស្ម័នធម្មជាតិ និង ៣០០លានបារ៉ែលប្រេងឆៅ៕
