ភ្លើងឆេះព្រៃនៅអាម៉េរិកជាង«១ពាន់ហិកតា»បណ្តាលឲ្យមនុស្សរាប់ពាន់នាក់ត្រូវភៀសខ្លួន

អាម៉េរិក៖ មនុស្សរាប់ពាន់នាក់ដែលកំពុងតែរស់នៅក្នុងក្រុងម៉ាលីបូនៃរដ្ឋកាលីហ្វ័រញ៉ាបានបង្ខំចិត្តជម្លៀសខ្លួនទៅកាន់ទីកន្លែងមានសុវត្ថិភាពជាបណ្តោះអាសន្នក្រោយពីភ្លើងបានឆាបឆេះព្រៃដ៏សន្ធោសន្ធៅនៅថ្ងៃពុធនេះ ដោយបានបំផ្លាញផ្ទះយ៉ាងតិច ៧ខ្នង នៅក្នុងតំបន់ព្រៃស្តុកមួយកន្លែង។ ភ្លើងឆេះព្រៃដ៏ខ្លាំងក្លានេះបានបណ្តាលឲ្យមានអចលនទ្រព្យតម្លៃរាប់លានដុល្លារ រងការបាត់បង់និងខូចខាតមិនធ្លាប់មាន។

អ្នកពន្លត់អគ្គីភ័យបានអះអាងថាដោយសារតែភ្នំចោតខ្លាំង និងផ្លូវចង្អៀតបានបង្កការរំខានដល់ក្រុមអ្នកជំនាញក្នុងការចូលទៅពន្លត់ភ្លើងដែលកំពុងតែឆាបឆេះជាខ្លាំង ខ្យល់បក់ខ្លាំង និងកម្លាំងនៃអគ្គិភ័យបានបង្កការឆាបឆេះកាន់តែខ្លាំងទៅដល់ព្រៃនៅក្នុងតំបន់។'

មន្រ្តីក្នុងតំបន់បានបញ្ជាក់ទៀតថាមានប្រជាពលរដ្ឋដែលរងផលប៉ះពាល់ប្រហែល ២០,០០០នាក់ ត្រូវបានជម្លៀសទៅកាន់ទីមានសុវត្ថិភាព ។គិតត្រឹមល្ងាចថ្ងៃពុធនេះភ្លើងបានឆាបឆេះរីករាលដាលកាន់តែខ្លាំងដល់ទៅជាង ១១៥០ហិកតា ដោយនៅតែមិនទាន់អាចពន្លត់បានទាំងស្រុងដោយសារតែកម្លាំងខ្យល់បក់ និងផ្លូវតូចចង្អៀត។

ជាការឆ្លើយតបអាជ្ញាធរបានបញ្ជូនយន្តហោះពន្លត់អគ្គិភ័យជាច្រើនគ្រឿង និងមន្រ្តីពន្លត់ភ្លើងជាង ១ពាន់នាក់ទៅកាន់កន្លែងភ្លើងឆេះដើម្បីធ្វើការពន្លត់។ មូលហេតុនៃការឆាតឆេះនេះកំពុងតែត្រូវបានមន្រ្តីជំនាញបើកការស៊ើបអង្កេត។

គួរបញ្ជាក់ថាទីក្រុងម៉ាលីបូនេះស្ថិតនៅចម្ងាយខ្លីពីស្ទូឌីយ៉ូធំៗរបស់ហូលីវូដ និងមានលំនៅដ្ឋានតារាហូលីវូដល្បីជាជាច្រើនដែលរស់នៅរួមមាន Lady Gaga, Leonardo DiCaprio, Jennifer Aniston និង តារាជាច្រើនដួងទៀត៕