អាម៉េរិក៖ ប្រធានាធិបតីចូបៃដិនបានយល់ព្រមលើការផ្តល់គ្រាប់មីនប្រឆាំងមនុស្សដល់អ៊ុយក្រែនជាច្រើនម៉ឺនគ្រាប់ ដែលជាជំហានដែលអាចជួយអ៊ុយក្រែនក្នុងការទប់ស្កាត់ដំណើរទៅមុខរបស់ទាហានរុស្ស៊ី។ ជំនួយថ្មីរបស់អាម៉េរិកថ្មីនេះធ្វើឡើងប៉ុន្មានថ្ងៃប៉ុណ្ណោះក្រោយពីលោកចូបៃដិនបានសម្រេចផ្តល់ភ្លើងខៀវឲ្យអ៊ុយក្រែនប្រើប្រាស់មីស៊ីលផលិតដោយអាម៉េរិកវាយចូលជ្រៅក្នុងទឹកដីរុស្ស៊ី
ការិយាល័យរបស់ប្រធានាធិបតីអ៊ុយក្រែនលោក Volodymyr Zelenskyy ក្រសួងការពារជាតិអ៊ុយក្រែន និងក្រសួងការពារជាតិរុស្ស៊ី មិនបានឆ្លើយតបភ្លាមៗចំពោះជំនួយថ្មីរបស់អាម៉េរិកនៅឡើយនោះទេ។មន្ត្រីអាម៉េរិកបានអះអាងថាគ្រាប់មីននេះមិនមែនជារឿងថ្មីនោះទេដោយពីកន្លងមក សហរដ្ឋអាម៉េរិកបានផ្តល់គ្រាប់មីនប្រឆាំងរថក្រោះដល់អ៊ុយក្រែនចាប់តាំងពីរុស្ស៊ីបើកប្រតិបត្តិការមកម្លេះ។ ជំនួយគ្រាប់មីនប្រឆាំងមនុស្សនេះមានគោលបំណងបង្អាក់ការឈានទៅមុខនៃកងទ័ពជើងគោករុស្ស៊ី៕
