នាយករដ្ឋមន្ត្រីអ៊ីស្រាអែលផ្ញើសារ«អបអរសាទរ»ត្រាំក្នុងការឈ្នះឆ្នោតអាណត្តិថ្មី

អ៊ីស្រាអែល៖ នាយករដ្ឋមន្ត្រីអ៊ីស្រាអែលលោក Benjamin Netanyahu នារសៀលថ្ងៃពុធនេះបានផ្ញើសារអបអរសាទរលោកត្រាំក្រោយពីលោកបានឈ្នះឆ្នោតអាណត្តិទី២ និងជាប្រធានាធិបតីអាម៉េរិកលើកទី ៤៧។ សារអបអរសាទរលោក Benjamin Netanyahu ត្រូវបានចែកចាយតាមបណ្តាញសង្គម X ដោយលោកបានសរសេរថាសូមអបអរសាទរចំពោះការត្រលប់មកជាប្រធានាធិបតីអាម៉េរិកវិញ ដែលនេះជាប្រវត្តិសាស្រ្តដ៏អស្ចារ្យមួយ ហើយការវិលត្រលប់ជាប្រវត្តិសាស្ត្ររបស់លោកដូណាល់ត្រាំទៅកាន់សេតវិមាននឹងបង្ហាញពីសម្ព័ន្ធមិត្តកាន់តែស្អិតរមួតរវាងអ៊ីស្រាអែល-អាម៉េរិក។

គួរបញ្ជាក់ថាអតីតប្រធានាធិបតីអាម៉េរិកលោក ដូណាល់ ត្រាំ ដែលធ្លាប់ត្រូវបានគេលួចធ្វើឃាតពីរដង និងជា បេក្ខជនប្រធានាធិបតីមកពីគណបក្សសាធារណរដ្ឋ បានផ្តួលលោកស្រីហារីសក្នុងការបោះឆ្នោតជ្រើសរើសប្រធានាធិបតីទី៤៧ ដោយលោកទទួលបាន សំឡេងអង្គបោះឆ្នោតរហូតដល់ ២៧៧សំឡេងច្រើនជាងលោក លោកស្រី កាម៉ាឡា ហារីសដោយលោកស្រីទទួលបានត្រឹម ២២៦សំឡេង៕