ថៃ៖ ស្ត្រីជនជាតិប៉ូឡូញម្នាក់ត្រូវបានប៉ូលីសថៃចាប់ឃុំខ្លួននៅអាកាសយានដ្ឋានអន្តរជាតិសុវណ្ណភូមិក្នុងប្រទេសថៃកាលពីល្ងាចថ្ងៃព្រហស្បតិ៍បន្ទាប់ពីរូបនាងបានគម្រាមបំផ្ទុះគ្រាប់បែកក្នុងអំឡុងពេលធ្វើដំណើរតាមជើងហោះហើរ Thai Vietjet ពីទីក្រុង Da Nang ប្រទេសវៀតណាម ឆ្ពោះទៅកាន់ទីក្រុងបាងកក។ នេះបើយោងតាមការចុះផ្សាយរបស់កាសែតថៃបាងកកប៉ុស្តិ៍ចេញផ្សាយ។
តាមអាជ្ញាធរថៃជើងហោះហើរ VZ961 បានដឹកមនុស្ស ១២១ នាក់ រួមទាំងទារកម្នាក់ និងសមាជិកនាវិក ៦ នាក់។ មន្ត្រីសន្តិសុខបានធ្វើការស្រាវជ្រាវយ៉ាងម៉ត់ចត់នូវអ្នកដំណើរ និងឥវ៉ាន់ដៃរបស់ពួកគេ ក៏ប៉ុន្តែអាជ្ញាធររកមិនឃើញជាតិផ្ទុះ រឺគ្រាប់បែកដូចដែលជនសង្ស័យបានគំរាមនោះឡើយ។ អាជ្ញាធរថៃបានចាត់ទុកនេះគ្រាន់តែជាការគំរាមពេលកំពុងធ្វើដំណើរតែប៉ុណ្ណោះ។
តាមច្បាប់របស់ប្រទេសថៃ ស្តីពីបទល្មើសដែលបានប្រព្រឹត្តប្រឆាំងនឹងការហោះហើរតាមផ្លូវអាកាស ជនណាដែលដឹងព័ត៌មានមិនពិត បង្កឱ្យមានការភ័យស្លន់ស្លោនៅលើយន្តហោះដែលកំពុងហោះហើរ ត្រូវផ្តន្ទាទោសដាក់ពន្ធនាគាររហូតដល់ ៥ ឆ្នាំ ឬពិន័យជាប្រាក់ចំនួន ៦,១៥០ ដុល្លារអាម៉េរិក៕
