បាងកក៖ ព្រះមហាក្សត្រថៃ Maha Vajiralongkorn បានចុះហត្ថលេខាលើច្បាប់អាពាហ៍ពិពាហ៍ភេទដូចគ្នាដែលសម្រេចអនុញ្ញាតឲ្យអ្នកដែលស្រលាញ់ភេទដូចគ្នារៀបការបាន និងចុះអេតាស៊ីវិលបានធម្មតា។ ការសម្រេចចុះហេត្ថលេខារបស់ព្រះមហាក្សត្រថៃនេះធ្វើឡើងក្រោយពីប្រទេសថៃបានធ្វើវិសោធនកម្មច្បាប់សិក្សាលំអិតពីការអនុញ្ញាតឲ្យអ្នកដែលស្រលាញ់ភេទដូចគ្នារៀបការជាមួយគ្នាបានដូចអ្នកដែលមានភេទផ្ទុយគ្នា។
យោងតាមការចុះផ្សាយរបស់កាសែតថៃព្រះមហាក្សត្រថៃ Maha Vajiralongkorn បានសម្រេចចុះហត្ថលេខាងលើច្បាប់ថ្មីដែលអាចឲ្យពលរដ្ឋថៃស្រលាញ់ភេទដូចគ្នារៀបការបានធម្មតា និងទទួលស្គាល់ដោយច្បាប់នៃប្រទេសថៃ ដែលក្រិតថ្មីនឹងចូលជាធរមានក្នុងរយៈពេល ១២០ ថ្ងៃ ដែលមានន័យថាពិធីមង្គលការដំបូងត្រូវបានគេរំពឹងថានឹងធ្វើឡើងនៅក្នុងខែមករា។
ក្រៅពីប្រទេសថៃមានប្រទេសជាង ៣០ ជុំវិញពិភពលោកមានច្បាប់អនុញ្ញាតឱ្យអ្នកស្រលាញ់ភេទដូចគ្នារៀបអាពាហ៍ពិពាហ៍ស្របច្បាប់បានដោយប្រទេសហូឡង់បានក្លាយជាប្រទេសដំបូងគេដែលបានប្រារព្ធពិធីនៃការរៀបការភេទដូចគ្នាក្នុងឆ្នាំ ២០០១ ។ ប្រទេសថៃនឹងក្លាយជាប្រទេសទីបីក្នុងទ្វីបអាស៊ីដែលអ្នកស្រឡាញ់ភេទដូចគ្នាអាចរៀបការបានបន្តពីកោះតៃវ៉ាន់ និងនេប៉ាល់៕
