ភ្នំពេញ៖ក្រសួងការបរទេស និង សហប្រតិបត្តិការអន្តរជាតិកម្ពុជា នៅថ្ងៃទី ១៣ កញ្ញានេះ បានចេញនូវសេចក្តីថ្លែងការណ៍ ប្រតិកម្មចំនួនការសម្រេចរបស់រតនាគារអាម៉េរិកមកលើលោកអ្នកឧកញ៉ា លី យ៉ុងផាត់ និង ក្រុមហ៊ុន L.Y.P Grup.Co,Ltd ព្រមទាំងអាជីវកម្មពាក់ព័ន្ធចំនួន៤ផ្សេងទៀត។ក្នុងសេចក្តីថ្លែងការណ៍ បានចាត់ទុកថា ការសម្រេចចិត្តរបស់រតនាគារអាម៉េរិក គឺជារឿងអយុត្តិធម៌ដោយសារផ្អែកលើរបាយការណ៍គ្មានមូលដ្ឋានច្បាស់លាស់ និងបង្កប់ចេតនានយោបាយ។
ក្នុងសេចក្តីថ្លែងការណ៍ ក្រសួងការបរទេសកម្ពុជា បានពន្យល់ថា លោកអ្នកឧកញ៉ា លី យ៉ុងផាត់ បានដើរតួនាទីយ៉ាងសំខាន់ ក្នុងការចូលរួមអភិវឌ្ឍសេដ្ឋកិច្ច សង្គមកម្ពុជាអស់ជាច្រើនទសវត្សរ៍ និងបានទទួលស្គាល់យ៉ាងទូលំទូលាយ។ក្រុមហ៊ុនរបស់លោកក្រុមហ៊ុន L.Y.P Group ការចូលរួមចំណែករបស់លោកក្នុងការអភិវឌ្ឍហេដ្ឋារចនាសម្ព័ន្ធ ការបង្កើតការងារ និង ការកាត់បន្ថយភាពក្រីក្រ បានផ្តល់ផលជាវិជ្ជមានដល់ជីវភាពរស់នៅរបស់ប្រជាជនកម្ពុជាជាច្រើនពាន់នាក់។
ក្រសួងការបរទេសកម្ពុជា សម្តែងការសោកស្តាយការសម្រេចចិត្តរបស់រតនាគារអាម៉េរិក ដោយសារការជឿលើរបាយការណ៍ខុសគ្មានមូលដ្ឋាន ផ្ទុយទាំងស្រុងពីស្មារតីនៃការពង្រឹងទំនាក់ទំនងទ្វេភាគី និង ការជឿទុកចិត្តគ្នាទៅវិញទៅមក ដែលត្រូវបានបញ្ជាក់យ៉ាងច្បាស់ដោយលោក ឡយ ជ អូស្ទីន (Lloyd J. Austin III) រដ្ឋមន្ត្រីការពារជាតិអាម៉េរិកក្នុងអំឡុងទស្សនកិច្ចនៅកម្ពុជា កាលពីខែមិថុនាកន្លងទៅ។
យោងតាមសេចក្តីថ្លែងការណ៍ដដែល ក្រសួងការបរទេសកម្ពុជា បានអះអាងថា កន្លងទៅកម្ពុជាសម្រេចបាននូវវឌ្ឍនភាពជាច្រើន ក្នុងការដោះស្រាយបញ្ហា ដោយសហការយ៉ាងល្អជាមួយប្រទេសជាដៃគូអន្តរជាតិបូករួមទាំងអាម៉េរិកផងដែរ។កម្ពុជាមិនបានព្រងើយកន្តើយក្នុងការអនុវត្តច្បាប់ចំពោះឧក្រិដ្ឋកម្មណាមួយនោះឡើយ និងបើកចិត្តស្វាគមន៍ដល់កិច្ចសហប្រតិបត្តិការជាមួយប្រទេសជាដៃគូ។
គួរបញ្ជាក់ថា ក្រសួងហិរញ្ញវត្ថុអាម៉េរិក បានប្រកាសដាក់ទណ្ឌកម្មលើលោកអ្នកឧកញ៉ា លី យ៉ុងផាត់ និង អាជីវកម្មរបស់លោកដោយចោទថា ពាក់ព័ន្ធការជួញដូរមនុស្ស ការបង្ខំឲ្យធ្វើពលកម្មដោយខុសច្បាប់ និង ការបោកប្រាស់តាមអនឡាញ៕
