ភ្នំពេញ៖ ក្រសួងការពារជាតិកម្ពុជា កាលពីថ្ងៃទី ៣០ សីហាកន្លងទៅ បានចេញនូវសេចក្តីជូនដំណឹងមួយស្តីពី ការប្រើប្រាស់យានយន្តពាក់ផ្លាកលេខចរាចរខមរភូមិន្ទ។ក្នុងសេចក្តីជូនដំណឹងនោះ ក្រសួងបានបញ្ជាក់ថា អ្នកប្រើប្រាស់ត្រូវតែជានាយទាហានដែលមានសិទ្ធពេញលេញ ដោយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ។
សេចក្តីជូនដំណឹងរបស់ក្រសួងការពារជាតិ ធ្វើឡើងក្រោយពីសង្កេតឃើញថា ក្នុងរយៈពេលចុងក្រោយនេះ មាននូវបាតុភាពមួយចំនួនដែលធ្វើឱ្យប៉ះពាល់ដល់សង្គម សាធារណៈ ដូចជាបញ្ហាគ្រោះថ្នាក់ចរាចរណ៍ បុគ្គលអ្នកប្រើប្រាស់មួយចំនួន មានភាពក្រអឺតក្រទមមិន សក្តិសមជាមន្ត្រីយោធា ធ្វើឱ្យមានការវាយតម្លៃ និង ទទួលការរិះគន់ពីសាធារណជន ជាពិសេស ប៉ះពាល់ដល់កិត្តិយសនៃកងយោធពលខេមរភូមិន្ទទាំងមូល។
ដើម្បីឆ្លើយតប និង ការពារ ក្រសួងការពារជាតិ បញ្ជាក់បន្ថែមអំពី ការប្រើប្រាស់យានយន្តពាក់ផ្លាកលេខចរាចរខេមរភូមិន្ទទាំងអស់ អ្នកប្រើប្រាស់ត្រូវតែជានាយទាហានដែលមានសិទ្ធពេញលេញ ដោយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ។ ការប្រើប្រាស់យានយន្តពាក់ផ្លាក លេខចរាចរខេមរភូមិន្ទ ត្រូវស្របតាមការកំណត់របស់ក្រសួងការពារជាតិ ចំពោះក្រុមហ៊ុនសហការវិនិយោគ វិស័យការពារជាតិនានាក៏ត្រូវបានអនុវត្តដូចគ្នា។
ក្រសួងការពារជាតិ បានព្រមានថា ក្នុងករណីដែលអនុវត្តការប្រើប្រាស់ផ្ទុយខុសពីខ្លឹមសារ ខាងលើ អគ្គនាយកដ្ឋានសម្ភារៈបច្ចេកទេស ក្រសួងការពារជាតិ នឹងចាត់វិធានការច្បាប់ជាធរមាន៕
