រុស្ស៊ីទម្លាក់គ្រាប់បែកកម្ទេចអាគារក្រុងខាគៀវ សម្លាប់មនុស្ស៧នាក់

រុស្ស៊ី៖ រុស្ស៊ីបានទម្លាក់គ្រាប់បែកកម្ទេចអាគារមួយខ្នងក្នុងក្រុងខាងគៀវស្ថិតនៅភាគឦសាននៃប្រទេសអ៊ុយក្រែនដោយបានបង្កឲ្យមានការឆាបឆេះ និងកន្លែងសំខាន់មួយចំនួនទៀតត្រូវបានបំផ្លាញទាំងស្រុងក្នុងនោះរុស្ស៊ីបានសម្លាប់មនុស្ស ៧ នាក់ និងមានយ៉ាងហោចណាស់ ៧៧ នាក់ទៀតរងរបួសក្នុងការវាយប្រហារមួយនេះ។ ការវាយប្រហារមួយនេះកើតឡើងភ្លាមៗបន្ទាប់រុស្ស៊ីបានបាញ់ទម្លាក់ និងសម្លាប់អ្នកបើកយន្តហោះចម្បាំង F-16 របស់អ៊ុយក្រែនដែលជាជំនួយពីលោកខាងលិច។

បើតាមមន្រ្តីអ៊ុយក្រែនម្នាក់បានអះអាងថាក្មេងស្រីអាយុ ១៤ ឆ្នាំម្នាក់ត្រូវបានសម្លាប់នៅក្នុងសួនកុមារ ដោយសារការវាយប្រហារទម្លាក់គ្រាប់បែក និងអគារកម្ពស់ ១២ ជាន់បានឆាបឆេះ ហើយចំនួនមនុស្សស្លាប់ដោយសារការវាយប្រហារបានកើនឡើងដល់ ៧ នាក់ ដោយមនុស្សរងរបួសប្រហែល ២០ នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរ។ ក្រុមសមត្ថកិច្ចសង្គ្រោះបន្ទាន់ និងអ្នកស្ម័គ្រចិត្ត បានខិតខំប្រឹងប្រែងដើម្បីជួយសង្គ្រោះអ្នករស់រានមានជីវិតចេញពីអាគារ។

ភ្លាមៗបន្ទាប់ពីការវាយប្រហារនៅក្រុងខាគៀង លោក Zelenskyy បានអំពាវនាវដល់សម្ព័ន្ធមិត្តលោកខាងលិច ដើម្បីអនុញ្ញាតឱ្យអ៊ុយក្រែនប្រើប្រាស់អាវុធលោកខាងលិចរយៈចម្ងាយឆ្ងាយដើម្បីវាយប្រហារមូលដ្ឋានទ័ពអាកាសរបស់រុស្ស៊ី ដែលឈរជើងក្បែរតំបន់ខាគៀវ៕