ភ្នំពេញ៖ ឯកអគ្គរដ្ឋទូតចិនប្រចាំកម្ពុជា លោក Wang Wenbin នៅលើបណ្តាញសង្គមហ្វេសប៊ុកផ្លូវការរបស់ខ្លួននៅថ្ងៃទី២៨សីហានេះ បានឲ្យដឹងថាគណនី បណ្តាញសង្គមDouyin(TIK TOK ក្នុងប្រទេសចិន) ដែលពាក់ព័ន្ធនឹងការផ្សព្វផ្សាយព័ត៌មានមិនពិត អំពីកងទ័ពធ្វើរដ្ឋប្រហារនៅកម្ពុជា ត្រូវបានបិទចោលហើយ។
យោងតាមការបង្ហោះសាររបស់លោក Wang Wenbin បានសរសេរថា "គណនីដែលពាក់ព័ន្ធនឹងការផ្សព្វផ្សាយពាក្យចចាមអារ៉ាមមិនពិតអំពីប្រទេសកម្ពុជា ត្រូវបានបិទ។ យើងនឹងសហការជាមួយមិត្តភក្តិកម្ពុជា ក្នុងការប្រឆាំងយ៉ាងមុតមាំជាមួយនឹងព័ត៌មានដែលមិនពិត។"
ស៊ីស៊ីថាមស៌ នៅថ្ងៃនេះបានផ្ញើសារតាមបណ្តាញ WECHAT សួរទៅមន្រ្តីផ្នែកព័ត៌មាននៃស្ថានទូតចិនប្រចាំកម្ពុជា អំពីម្ចាស់គណនី Douyin ដែលផ្សាយព័ត៌មានមិនពិតគីជាពលរដ្ឋចិន ឬជាជនបរទេស? ហើយបើសិនជាម្ចាស់គណនី Douyin នេះកំពុងរស់នៅប្រទេសចិន តើអាជ្ញាធរចិននឹងបន្តចាត់វិធានការច្បាប់ដែរឬទេ?
បច្ចុប្បន្ននេះ សំណួរនេះ មន្រ្តីផ្នែកព័ត៌មាននៃស្ថានទូតចិនប្រចាំកម្ពុជាមិនទាន់បានឆ្លើយតបនៅឡើយទេ។
លោក Wang Wenbin កាលពីថ្ងៃទី២៣សីហា បានសរសេរសារក្នុងបណ្តាញសង្គម ប្រកាសថ្កោលទោស ចំពោះការប្រឌិត និងផ្សព្វផ្សាយព័ត៌មានក្លែងក្លាយ ហើយនឹងសហការជាមួយមិត្តភ័ក្ដិកម្ពុជា ដើម្បីទប់ស្កាត់និងប្រឆាំងនឹងព័ត៌មានក្លែងក្លាយ។ ការប្រកាសនេះធ្វើឡើងក្រោយឃើញមានឃ្លីបវីដេអូជាភាសាចិន ដែលបានផ្សព្វផ្សាយព័ត៌មានមិនពិតទាក់ទងកងទ័ពកម្ពុជាធ្វើរដ្ឋប្រហារទម្លាក់រាជរដ្ឋាភិបាលដែលដឹកនាំដោយសម្តេច ហ៊ុន ម៉ាណែត។
គួរបញ្ជាក់ថា អ្នកនាំពាក្យក្រសួងការពារជាតិកម្ពុជា កាលពីថ្ងៃទី ២២ សីហា បានធ្វើសេចក្តីថ្លែងការណ៍មួយ ច្រានចោល ការចុះផ្សាយមិនពិតថា «កងទ័ពធ្វើរដ្ឋប្រហារចាប់ខ្លួនសម្ដេច ហ៊ុន ម៉ាណែត និង សម្តេច ហ៊ុន សែន»។ អ្នកនាំពាក្យ បានចាត់ទុកការផ្សាយនេះ គឺជាទង្វើទុច្ចរិតដ៏អាក្រក់ និង ព្រមានចាត់វិធានការច្បាប់ ដោយគ្មានលើកលែងឡើយ ចំពោះក្រុមជ្រុលនិយម៕
