ក្រុមកីឡាម៉ូតូទឹកជម្រើសជាតិកម្ពុជា ដណ្ដើមបានមេដាយ ៦គ្រឿង ក្នុងព្រឹត្តិការណ៍ប្រណាំងម៉ូតូទឹកពានរង្វាន់ពិភពលោក WATERJET World Series 2024 ជុំទី១ នៅទីក្រុង Ostrow Warcki ប្រទេសប៉ូឡូញ ដោយដណ្ដើមបានមេដាយមាស ២ ប្រាក់ ២ និងសំរឹទ្ធ ២។
ព្រឹត្តិការណ៍ប្រណាំងម៉ូតូទឹកកម្រិតពិភពលោក នៅអឺរ៉ុប ក្នុងឆ្នាំនេះ ដឹកនាំដោយកីឡាករ សាលី អ៊ូមើត ជាប្រធាន និងជាអគ្គលេខាធិការសហព័ន្ធ ដោយធ្វើឲ្យក្រុមដណ្ដើមបានមេដាយ ៦គ្រឿង ក្នុងព្រឹត្តិការណ៍ប្រណាំងម៉ូតូទឹកពានរង្វាន់ពិភពលោក WATERJET World Series 2024 ជុំទី១ នៅទីក្រុង Ostrow Warcki ប្រទេសប៉ូឡូញ រួមមានមេដាយមាស ២ ប្រាក់ ២ និងសំរឹទ្ធ ២ បន្ទាប់ពីការប្រកួតនេះ បានចាប់ផ្ដើមពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៤។ ក្នុងនោះ កីឡាករកម្ពុជា សាលី ហ្វីលីន ដណ្ដើមបានមេដាយមាស លើវិញ្ញាសា Expert Runabout 1100 Super Stock និងកីឡាករ កៃ វ៉ាន់ស៊ីដែន ដណ្ដើមបានមេដាយមាស លើវិញ្ញាសា Novice Ski Stock ។
ចំណែកប្រធានក្រុមម៉ូតូទឹកកម្ពុជា កីឡាករ សាលី អ៊ូមើត ដណ្ដើមបានមេដាយ ២គ្រឿង រួមមានមេដាយប្រាក់ ១ លើវិញ្ញាសា Pro AM Runabout 1100 Open និងមេដាយសំរឹទ្ធ ១ លើវិញ្ញាសា Pro Sport GP ខណៈកីឡាករ ម៉ីន មូសស្ដាន ដណ្ដើមបានមេដាយប្រាក់ លើវិញ្ញាសា Novice Runabout 1100 Stock និងកីឡាករ ម៉ីន អូស្មាន់ ដណ្ដើមបានមេដាយសំរឹទ្ធ លើវិញ្ញាសា Novice Ski Stock ផងដែរ៕
