សេដ្ឋីឥណ្ឌាចាយលុយជាង«៦០០លាន»ដុល្លារក្នុងពិធីមង្គលការ

ឥណ្ឌា៖ លោក Mukesh Ambani ដែលជាមហាសេដ្ឋីប្រចាំទ្វីបអាស៊ី បានរៀបចំពិធីមង្គលការកូនពៅរបស់ខ្លួន លោក Anant Ambani និង Radhika Merchant ដែលបានរៀចំប្រារព្ធពិធីមង្គលការដ៏ធំបំផុតដែលមិនធ្លាប់មាន រយៈពេលបីថ្ងៃនៅទីក្រុងបុមបៃ ចាប់ផ្តើមពីថ្ងៃទី ១២ ដល់ ១៤ ខែកក្កដា ជាមួយទស្សនីយភាពដ៏អស្ចារ្យដែលទាក់ទាញការចូលរួមពីបុគ្គលល្បីៗទូទាំងពិភពលោក រួមមានកញ្ញា Kim Kardashian និង Khloe Kardashian,លោក Gianni Infantino, លោក Tony Blair, John Cena, និង Priyanka Chopra លោក Nick Jonas និងតារាល្បីៗជាច្រើនទៀត ។

ក្នុងការរៀបចំកម្មវិធីនេះ លោក Ambani បានចំណាយប្រាក់ដ៏ច្រើនសន្ធឹកសន្ធាប់សម្រាប់ផ្ដល់ការកម្សាន្តដល់ភ្ញៀវដែលបានចូលរួម។ កម្មវិធីនីមួយៗ លោកបានបង់ប្រាក់ចំនួនជាង ៩ លានដុល្លារ ទៅ ១០ លានដុល្លាររៀងៗខ្លួនសម្រាប់ការសម្តែងរបស់ក្រុមសិល្បៈករល្បីៗដែលមកពីទ្វីអ៊ឺរ៉ុប។ ការចំណាយក្នុងមង្គលការត្រូវបានគេគេប៉ាន់ប្រមាណថាអាចចំណាយសរុបជាង ៦០០ លានដុល្លារ។ ការចំណាយដ៏ច្រើននេះ រួមបញ្ចូលក្នុងព្រឹត្តិការណ៍ pre-wedding ចំនួន ១១ ដែលរួមមានការជិះទូកកម្សាន្តដ៏ប្រណីតដែលមានការសម្តែងដោយតារាចម្រៀងកញ្ញា Katy Perry និង Backstreet Boys ដោយត្រូវចំណាយប្រាក់ប្រមាណ ៣០០ លានដុល្លារ។ ជាមួយគ្នានោះ គេបានរៀបចំវិធានការសន្តិសុខយ៉ាងច្រើនដើម្បីការពារសុវត្ថិភាព តារាល្បី ឥស្សរជនមានឥទ្ធិពល និងការអនុវត្តបច្ចេកវិទ្យាសម្គាល់មុខរបស់ភ្ញៀវផងដែរ។

នៅក្នុងការប្រៀបធៀបទៅនឹងពិធីមង្គលការជាប្រវត្តិសាស្ត្រ ពិធីមង្គលការ Ambani-Merchant លើសពីការចំណាយដែលទាក់ទងនឹងពិធីមង្គលការរបស់ម្ចាស់ក្សត្រី Diana និងព្រះអង្គម្ចាស់ Charles ដែលត្រូវបានគេប៉ាន់ប្រមាណថាមានចំនួនប្រហែល ១៦៣ លានដុល្លារ។ លោក Mukesh Ambani អាយុ ៦៦ឆ្នាំ ជាប់ចំណាត់ថ្នាក់ជាមហាសេដ្ឋីលំដាប់ទី៩ នៅលើពិភពលោក ជាមួយនឹងទ្រព្យសម្បត្តិសុទ្ធចំនួន ១១៦ ពាន់លានដុល្លារ នេះបើយោងតាមទស្សនាវដ្តី Forbes ហើយគាត់ក៏ជាអ្នកមានបំផុតនៅអាស៊ី៕