ខេត្តព្រះសីហនុ៖ ឯឧត្តមម៉ាង ស៊ី ណេត អភិបាលខេត្តព្រះសីហនុ នៅថ្ងៃទី ៧ កក្កដានេះ ត្រូវបានប្រកាសមុខតំណែងជាប្រធានបក្សប្រជាជនកម្ពុជា ខេត្តព្រះសីហនុ ជំនួសលោក គួច ចំរើន សមាជិកគណៈកម្មាធិការកណ្តាល គណបក្សប្រជាជនកម្ពុជា។ពិធីប្រកាសនេះ ធ្វើឡើងក្រោមអធិបតីភាពលោក សាយ សំអាល់ សមាជិកគណៈអចិន្ត្រៃយ៍ គណៈកម្មាធិការកណ្ដាល និង ជាប្រធានក្រុមការរងារគណបក្ស ចុះមូលដ្ឋានខេត្តព្រះសហីនុ និង លោក សោម សឿន សមាជិកគណៈអចិន្ត្រៃយ៍ គណៈកម្មាធិការកណ្ដាល និង ជាប្រធានគណៈចាត់តាំងគណៈកម្មការកណ្តាល ។
ក្នុងពិធីប្រកាសនោះ លោក សោម សឿន បានថ្លែងរំលឹកដល់មន្ត្រីពាក់ព័ន្ធថា មន្ត្រីមិនមែនជាចៅហ្វាយប្រជាជននោះទេ ដូច្នេះមន្ត្រីគណបក្សគ្រប់ជាន់ថ្នាក់ត្រូវអនុវត្តតួនាទី និង ភារកិច្ចរបស់ខ្លួនប្រកបដោយវិជ្ជាជីវៈ ប្រកបដោយគុណធម៌ និងសីលធម៌ បម្រើរាស្ត្រចេញពីបេះដូង ប្រកបដោយសុជីវធម៍ ជៀសវាងភាពអសកម្មនានា និង បំពានលើគោលការណ៍ដឹកនាំរបស់គណបក្ស ផ្ទុយពីច្បាប់ និង លិខិតបទដ្ឋានគតិយុទ្ធជាធរមាន បង្កផលប៉ះពាល់ដល់សតិអារម្មណ៍ និង ផលប្រយោជន៍របស់ជាតិ និងប្រជាជន សំដៅបង្កើនការជឿទុកចិត្តការគោរពស្រឡាញ់ និងការគាំទ្រចំពោះគណបក្សប្រជាជនកម្ពុជាយើងពីសំណាក់បងប្អូនប្រជាពលរដ្ឋទាំងបច្ចុប្បន្ន និងអនាគតយូរអង្វែង។
លោក សោម សឿន បានជំរុញឱ្យក្ដាប់សភាពការណ៍ល្អ ជុំវិញសភាពការណ៍សន្តិសុខសណ្ដាប់ធ្នាប់សង្គមជារួមនៃខេត្តកណ្ដាល និង តាមបណ្ដាក្រុងស្រុកនានា ត្រូវបានគ្រប់គ្រងល្អ។ រដ្ឋបាលខេត្ត ក្រុង ស្រុក ទាំងឃុំ សង្កាត់ និងអាជ្ញាធរគ្រប់លំដាប់ថ្នាក់ ត្រូវបន្តយកចិត្តទុកដាក់ខ្ពស់ក្នុងការថែរក្សាសន្តិសុខសុវត្ថិភាពនិងសណ្ដាប់ធ្នាប់សាធារណៈឱ្យបានម៉ត់ចត់ជាប្រចាំឱ្យសាកសមនឹងការជឿទុកចិត្តដ៏មោះមុតរបស់ប្រជាពលរដ្ឋលើការដឹកនាំរបស់គណបក្សប្រជាជនកម្ពុជាទាំងអស់គ្នា។
ទាក់ទងនឹងបទល្មើសវិញ លោក សោម សឿន ជំរុញដល់រដ្ឋបាលខេត្តក្រុង ស្រុក ឃុំ សង្កាត់ និងកងកម្លាំងមានសមត្ថកិច្ចគ្រប់លំដាប់ថ្នាក់ត្រូវបន្តជំរុញការអនុវត្តគោលនយោបាយភូមិ ឃុំ សង្កាត់មានសុវត្ថិភាព ដើម្បីលើកកម្ពស់ការចូលរួមបង្កទប់ស្កាត់ និងបង្ក្រាបបទល្មើសនានាឱ្យកាន់តែមានប្រសិទ្ធភាពខ្ពស់បន្ថែមទៀត។ បង្ក្រាបរាល់បទល្មើសល្បែងស៊ីសងខុសច្បាប់ ការប្រើប្រាស់និងការជួញដូរគ្រឿងញៀនខុសច្បាប់ ការជួញដូរមនុស្សតាមគ្រប់ទម្រង់ ការជម្រិតទារប្រាក់ បទល្មើសឆបោកតាមប្រព័ន្ធបច្ចេកវិទ្យាព័ត៌មាន និងជាពិសេសសកម្មភាពក្មេងទំនើងគ្រប់រូបភាពស្របតាមការណែនាំដ៏ខ្ពង់ខ្ពស់របស់សម្ដេចធិបតីនាយករដ្ឋមន្ត្រី នាពេលកន្លងទៅ៕
![](https://cdn.cc-times.com/kh.cc-times.com/media/50403/large/photo_2024-07-07_12-23-02.jpg?1720407115)
![](https://cdn.cc-times.com/kh.cc-times.com/media/50402/large/photo_2024-07-07_12-23-03.jpg?1720407115)
![](https://cdn.cc-times.com/kh.cc-times.com/media/50404/large/photo_2024-07-07_12-23-05.jpg?1720407116)
![](https://cdn.cc-times.com/kh.cc-times.com/media/50405/large/photo_2024-07-07_12-23-06.jpg?1720407116)
![](https://cdn.cc-times.com/kh.cc-times.com/media/50408/large/photo_2024-07-07_12-23-08.jpg?1720407117)
![](https://cdn.cc-times.com/kh.cc-times.com/media/50406/large/photo_2024-07-07_12-23-09_(2).jpg?1720407116)
![](https://cdn.cc-times.com/kh.cc-times.com/media/50407/large/photo_2024-07-07_12-23-09.jpg?1720407117)
![](https://cdn.cc-times.com/kh.cc-times.com/media/50409/large/photo_2024-07-07_12-23-14.jpg?1720407117)