រត់ជាន់គ្នាក្នុងពិធីសាសនានៅឥណ្ឌាផ្ដាច់ជីវិតមនុស្ស ១១៦ នាក់

ឥណ្ឌា៖ យ៉ាងហោចណាស់មនុស្ស ១១៦នាក់ ដោយភាគច្រើនជាស្ត្រី និងកុមារ ត្រូវបានស្លាប់បាត់បង់ជីវិតនៅក្នុងហេតុការណ៍រត់ជាន់គ្នា នៅភាគខាងជើងប្រទេសឥណ្ឌា កាលពីល្ងាចថ្ងៃទី២ ខែកក្កដា។ ហេតុការណ៍នេះ បានកើតឡើងនៅក្នុងតំបន់ Hathras ក្នុងរដ្ឋ Utter Pradesh ចម្ងាយប្រហែល ២០០ គីឡូម៉ែត្រភាគអាគ្នេយ៍នៃរដ្ឋធានីញូវដែលី ជាកន្លែងដែលមនុស្សរាប់ពាន់នាក់ប្រមូលផ្តុំគ្នាដើម្បីធ្វើពិធីសាសនាមួយ។

អាជ្ញាធរឥណ្ឌាបនាអះអាងថាការរត់ជាន់គ្នាបានកើតឡើងនៅពេលដែលហ្វូងមនុស្សអ្នកកាន់សាសនាហិណ្ឌូទាំងអស់ ព្យាយាមរុញបន្តកន្ទុយគ្នាសម្រុកគ្នាទៅកាន់ឆាក ដើម្បីបានប៉ះដៃអ្នកដឹកនាំសាសនារបស់ពួកគេ ដោយសារតែកន្លែងចង្អៀតទើបបណ្តាលឲ្យមានរត់ជាន់ជើងគ្នារហូតដល់ស្លាប់មនុស្ស ១១៦ នាក់ នឹងជាច្រើននាក់ទៀតរងរបួស។ សាក្សីម្នាក់ដែលមិនបញ្ចេញឈ្មោះបានឲ្យដឹងថា មានផ្លូវចេញតូចចង្អៀតនៅកន្លែងកើតហេតុ ហើយមានមនុស្សប្រមាណ ៥០,០០០នាក់ នៅទីនោះបានព្យាយាមរុញសម្រុកចេញពីការប្រមូលផ្ដុំនោះ នៅពេលដែលពួកគេព្យាយាមចេញទៅច្រកទ្វាភ្លាមៗនោះ ក៏កើតមានភាពចលាចលបានចាប់ផ្តើមកើតឡើង។

នៅក្នុងឆ្នាំ ២០១៣ ក៏ធ្លាប់មានហេតុការណ៍រត់ជាន់គ្នានៅភាគកណ្តាលប្រទេសឥណ្ឌាដោយពេលនោះបានសម្លាប់មនុស្ស ១១៥ នាក់ និងជិត ២៥០ នាក់បានស្លាប់ក្នុងឆ្នាំ ២០០៨ និងច្រើនជាង ៣៤០ នាក់ត្រូវបានស្លាប់ក្នុងអំឡុងពេលធម្មយាត្រាប្រចាំឆ្នាំនៅរដ្ឋ Maharashtra ភាគខាងលិចក្នុងឆ្នាំ ២០០៥។ នាយករដ្ឋមន្ត្រី Narendra Modi បាននិយាយថា រដ្ឋាភិបាលឥណ្ឌា នឹងប្រកាសផ្តល់សំណងចំនួន ២០០,០០០ រូពី (២,៤០០ ដុល្លារអាម៉េរិក) ដល់គ្រួសារនៃអ្នកស្លាប់ និង ៥០,០០០ រូពីសម្រាប់អ្នករងរបួស៕